Չպետք է մեկի գալով մյուսի գնալը պայմանավորել. Վիգեն Չալդրանյանի նշանակման մասին

Սոս Սարգսյանի անվան համազգային թատրոնն այսուհետ գեղարվեստական ղեկավար կունենա: Թատրոնի տնօրենը` Վարդան Մկրտչյանը, թատրոնի գեղարվեստական ղեկավար է նշանակել ռեժիսոր Վիգեն Չալդրանյանին:

Վարդան Մկրտչյանը Yerkir.am-ի հետ զրույցում նշեց, որ գեղարվեստական ղեկավարի նշանակումը միայն մեկ միտում ունի` ակտիվացնել թատրոնի գեղարվեստական կյանքը և դրա որակն ավելի բարձրացնել:

Հարցին, թե ի՞նչ դերակատարում է ունենալու ինքը թատրոնում, Մկրտչյանը պատասխանեց, որ, ինչպես միշտ, շարունակելու է օգտակար լինել թատրոնին: «Այսինքն` այնպես չէ, որ մեկը գալիս է, մյուսի գործառույթը նվազում է և հակառակը: Պետք է կառուցողական շարժվել: Չպետք է մեկի գալով մյուսի գնալը պայմանավորել»,- ասաց նա:

Ի դեպ, երկուշաբթի մշակույթի նախարար Արմեն Ամիրյանը թատրոնի անձնակազմին կներկայացնի նորանշանակ գեղարվեստական ղեկավարին։