Վիգեն Չալդրանյանի ֆիլմը հետաքրքրել է Ժնեւի հայ համայնքին

Օրերս արվեստագիտության թեկնածու, կինոգետ, Երեւանի թատրոնի եւ կինոյի պետական ինստիտուտի դոցենտ Սիրանուշ Գալստյանը հրավիրվել էր Շվեյցարիա` տեղում հայ կինոյի պատմության մասին դասախոսությամբ հանդես գալու:

Yerkir.am-ի հետ զրույցում Գալստյանը նշեց, որ միջոցառման ընթացքում դասախոսությանը զուգահեռ ցուցադրվել են նաեւ ֆիլմեր:

«Ցուցադրվեց Վիգեն Չալդրանյանի «Ձայն լռության» ֆիլմը, որն ընտրել էինք Ազգային կինոկենտրոնի տնօրեն Գեւորգ Գեւորգյանի հետ համատեղ: Ֆիլմը մեծ հետաքրքրություն առաջացրեց, եւ չնայած արդեն կեսգիշերին մոտ էր, մարդիկ ցանկանում էին քննարկել այն, անգամ հարցրին, թե ինչպե՞ս կարող են ֆիլմի սկավառակը ձեռք բերել: Հանդիսատեսներից մեկն անգամ նշեց, որ վաղուց չէր դիտել նման մի ֆիլմ, որը չնայած ստեղծվել է բավական սուղ միջոցներով, սակայն կարողացավ ողջ ընթացքում լարված պահել հանդիսատեսին»,-ասաց Գալստյանը:

Նա տեղեկացրեց նաեւ, որ ցուցադրվել են նաեւ երկու վավերագրական կարճամետրաժ ֆիլմեր` Աշոտ Մկրտչյանի «Non-Stop» եւ «Ձմեռային մեղեդի» կինոնկարները:

«Ուշագրավ է այն, որ հանդիսատեսի մեջ կային նաեւ շվեյցարացիներ, որոնք նույնպես մինչեւ վերջ հետաքրքրությամբ լսեցին ինձ եւ նայեցին ֆիլմերը: Նրանց համար նաեւ իմ` «Հայացք մեր կինոյին. պատմությունը եւ ներկան» մենագրությունը եւ Արծվի Բախչինյանի «Հայերը համաշխարհային կինոյում» գրքերն էի տարել»,-ասաց Գալստյանը: