Սա կարևոր դաս էր. Սերժ Թանկյան

Ստորագրահավաքի միջոցով պարզ դարձավ, որ սփյուռքահայերը կտրված են Հայաստանի քաղաքական, սոցիալական, տնտեսական իրադարձություններից. այսօր հրավիրված մամուլի ասուլիսում ասաց ամերիկահայ ռոք երաժիշտ և երգահան, աշխարհահռչակ System of a Down խմբի հիմնադիր Սերժ Թանկյանը:

Նա նշեց նաև, որ իրենց` «Արդարություն Հայաստանում» նախաձեռնությանը միացել է ընդամենը 4400 քաղաքացի, քանի որ իրենց համար շատ կարևոր է ստորագրողների` հայ լինելը, իսկ սա, ըստ Թանկյանի, արդեն նվազեցնում է ստորագրողների թիվը:

«Շատ կարևոր է ասել, որ սփյուռքահայությունը բավականին անջատված է հայաստանյան իրադարձություններից` լինի քաղաքական, սոցիալական, թե` տնտեսական: Սա կարևոր դաս էր` հասկանալու, որ սփյուռքահայությունն ավելի շատ է անջատված Հայաստանից, քան մենք պատկերացնում էինք: Սա պետք է շտկել»,- ասաց Թանկյանը` հավելելով, որ «Արդարություն Հայաստանում» նախաձեռնության նպատակը Հայաստանում ընտրությունների վերահսկումն է և դրանց` ազատ ու անկախ լինելն ապահովելը: Ըստ նրա`  իրենց թիրախը Հայաստանի հայերը չեն, այլ դրսի: «Դրա համար էլ նրանք, ովքեր «քաղաքական  մարդիկ» չեն, չեն միանում ստորագրահավաքին»,- ասաց Թանկյանը: