Ցեղասպանության ճանաչումը միայնակ չպետք է գա. Սերժ Թանկյան

Ցեղասպանությունը նաև մշակույթի մի հոծ զանգված պոկեց-տարավ հայ ժողովրդից. այսօր լրագրողների հետ հանդիպման ժամանակ ասաց System of a Down խմբի վոկալիստ Սերժ Թանկյանը: Ըստ նրա` այն, ինչ կատարվում է կյանքում` չի կարող իր անդրադարձը չունենալ արվեստի, մշակույթի մեջ: Հենց սա է պատճառը, ըստ Թանկյանի, որ հայկական երաժշտության մեջ կա այդ 600 տարվա Օսմանյան կայսրության ստրկության կյանքը, Ցեղասպանությունը:

Yerkir.am-ի հարցին, թե Ցեղասպանության ճանաչում ասելով` մասնավորապես ինչ պետք է հասկանալ և ինչ պահանջներ առաջ քաշել` Թանկյանը պատասխանեց, որ հարցի պատասխանը շատ պարզ է.«Առաջին հերթին պետք է Թուրքիայի կառավարությունը ճանաչի իր գործածը և արդարության ճամփան բացվի: Ցեղասպանության ճանաչումը պետք է արդարության և մեր մյուս պահանջների իրականացման համատեղությամբ լինի: Ցեղասպանության ճանաչումը միայնակ չպետք է գա»: