Խոսրով Հարությունյանը խայթեց Նաիրա Զոհրաբյանին

Այսօր ԱԺ արտահերթ նիստում քննարկվում էր «Կուսակցությունների մասին» օրենքում փոփոխություններ ու լրացումներ անելու հարցը, որի մասին զեկուցում էր արդարադատության նախարար Արփինե Հովհաննիսյանը:

ԲՀԿ խմբակցության ղեկավար Նաիրա Զոհրաբյանը խիստ քննադատության ենթարկեց մանր կուսակցություններին, մարդ-կուսակցություններին` ասելով, որ դրանք լուրջ վնաս են հասցնում քաղաքական կյանքին, որովհետև ոչինչ չեն անում, քաղաքական գործունեությամբ չեն զբաղվում և միայն ընտրությունների ժամանակ առք ու վաճառք են կազմակերպում` իրենց ծառայությունները մատուցելով խոշոր կուսակցություններին` դրանց դիմաց ստանալով պաշտոններ:

Նաիրա Զոհրաբյանի հարցից հետո հերթագրվել էր ՀՀԿ խմբակցության պատգամավոր, ՀՀ Քրիստոնեա-դեմոկրատական կուսակցության նախագահ Խոսրով Հարությունյանը: Նշենք, որ Խոսրով Հարությունյանի կուսակցությունը ասոցացվում է մարդ-կուսակցության հետ, և հենց նա էր, ով ընտրությունների ժամանակ ընդգրկվեց ՀՀԿ ցուցակում` դառնալով պատգամավոր:

Խոսրով Հարությունյանը նախ փորձեց հակահարված տալ Նաիրա Զոհրաբյանի սուր քննադատությանը: «Տիկի'ն Զոհրաբյան, մեր իրականության մեջ լուրջ, ազդեցիկ կոչվող կուսակցություններ կան, որոնք այս խորհրդարանում ընդամենը մեկ տարի չկարողացան պահել իրենց խմբակցության կազմը, այնպես որ` բարի եղեք կուսակցության որակի մասին խոսելիս չպայմանավորենք դա միայն քանակով: Ցավոք, մեզանում, ազդեցիկ կուսակցություն ասելով, հասկանում են անդամների հսկայական քանակ ունեցող կուսակցությունները` առանց հաշվի առնելու, թե այդ կուսակցությունը հանրային կյանքի կազմակերպման հարցում իր դոկտրինն ունի՞, ունա՞կ է հանրության սպասելիքները բավարարել: Այս ամենը ավելի կարևոր է: Եվ ո՞վ է որոշում, թե քանի կուսակցությունն է մեր քաղաքական համակարգին հարմար, ո՞րն է չափանիշը»,- ասաց պատգամավորը: