Մեր ասածն այն է, որ կառավարությունը գնա կամավորության սկզբունքով. Արամ Մանուկյան

ԱԺ ՀԱԿ խմբակցության քարտուղար Արամ Մանուկյանը խորհրդարանական ճեպազրույցների ընթացքում հիշեցրեց, որ ապրիլյան դեպքերից տուժածներին օգնություն ցույց տալու նպատակով հավաքագրվել են դրամական միջոցներ, և մեր հասարակությունը մշտապես պատրաստակամ է եղել հայրենիքը պաշտպանող զինծառայողներին օգնել և զինվորի նկատմամբ հարգանք ունի:

«Մեր ասածն այն է, որ եթե կառավարությունը գնա կամավորության սկզբունքով, շատ ավելի արդյունավետ կլինի, որովհետև պարտադիրը մարդուն բերում է հակադրվելուն»,- մտահոգություն հայտնեց պատգամավորը՝ անդրադառնալով 1000 դրամ հատկացումներ անելու նախագծին:

«Ես ստորագրել եմ, որ իմ աշխատավարձից տոկոս գնա զինվորների խնդիրները լուծելուն: Դրա համար հպարտ եմ: Եթե պետք լինի, տասնապատիկը կտամ»,- ասաց Մանուկյանը, սակայն կրկին շեշտեց, որ հասարակությանը վանում է այս նախագծի մեջ տեղ գտած` պարտադիրի սկզբունքը:

«Պարտադիր կամավորականությունը սովետին բնորոշ բան է, մարդու ազատությունը  պարտադրանքներով կաշկանդել չի կարելի, այն էլ այն դեպքում, երբ դա հումանիզմի դաշտ է. սեփական երկրի զինվորին օգնելը պատվի, արժանապատվության, հպարտության խնդիր է»,- ասաց նա:

Մանուկյանը նշեց, որ ինքը կողմ է կամավորության սկզբունքին: