Ֆյուլեի ասածն առիթ չէ` աշխատանքները դադարեցնելու. Գալուստ Սահակյան

Թեեւ ԵՄ հանձնակատար Շտեֆան Ֆյուլեն եւս հայտարարում է, որ Ասոցացման համաձայնագիրն ու Մաքսային միությունն անհամատեղելի են, իշխանությունները շարունակում են ակնարկել, որ Ասոցացման համաձայնագիրն, այդուհանդերձ, կնախաստորագրվի:

Այսօր ԱԺ-ում լրագրողների հետ զրույցում ԱԺ ՀՀԿ խմբակցության ղեկավար Գալուստ Սահակյանը հայտարարեց, որ Ֆլուլեի ասածն առիթ չէ, որ Հայաստանը մտածի իր աշխատանքները Եվրամիության հետ դադարեցնելու մասին:  Նա ընդգծեց, որ գործընթացների հիմնական պատասխանատուն Ֆյուլեն է, նրա վրա է դրված գործընթացը մինչև վերջ հասցնելը, բայցեւ նշեց, որ երկրորդ կողմից պաշտոնական տեսակետ դեռ չի հաղորդվել:

Yerkir.am-ի դիտարկմանը` ՀՀ իշխանությունները չե՞ն ուզում հասկանալ կամ ընդունել, որ ԵՄ-ը չի ցանկանում Հայաստանի հետ նախաստորագրել Ասոցացման համաձայնագիրը, ՀՀԿ խմբակցության ղեկավարն ասաց. «Դա ցանկություն չի, դա գործընթացներ են, որը մեր մոտ ամրագրված է, և մենք շարունակում ենք աշխատել: Կարծում եմ, որ արդյունքներ կունենանք, համենայն դեպս, մենք այդ ճանապարհով ենք ընթանում»: