Փոխզիջումների մասին բարձրաձայնելը կոռեկտ չէ. Շավարշ Քոչարյան

Երբ Բաքուն խոսի զիջումների մասին, այն ժամանակ էլ կարելի է խոսել փոխզիջումների մասին: Քանի դեռ այնտեղ այդ մասին չեն խոսում, դրա մասին բարձրաձայնելը կոռեկտ չէ. այսօր լրագրողների հետ ճեպազրույցում ասաց ՀՀ փոխարտգործնախարար Շավարշ Քոչարյանը՝ անդրադառնալով ԼՂ հարցով հնարավոր փոխզիջումներին:

«Այլ բան է, երբ ասում ենք, որ, բանակցային գործընթացի հետ կապված, պատրաստ ենք փոխզիջումների, բայց քանի դեռ որևէ հայտարարություն չկա Ադրբեջանի կողմից, ավելին` քանի դեռ այնտեղ դիրքորոշումն ավելի է կոշտանում, ապա հայկական կողմից ինչ-որ զիջումների մասին խոսելն անիմաստ է»,- ասաց նա:

Պատասխանելով հարցին, թե ի՞նչ սպասելիքներ ունի հայկական կողմն Ադրբեջանից, Քոչարյանն ընդգծեց. «Մեր նպատակը հստակ է` ԼՂՀ-ն չի կարող լինել Ադրբեջանի կազմում, բացի այդ` պետք է երաշխավորված լինի ԼՂՀ ժողովրդի անվտանգությունը: Այդ երկու հարցադրումը հստակ դրված է, և այդ մասին բազմիցս ասվել է»:

Անդրադառնալով Պուտին-Սարգսյան-Ալիև հնարավոր հանդիպմանը` նա նշեց. «Բանակցային գործընթացում նմանատիպ հանդիպումների ձգտում կա: Որպես կանոն` հայկական կողմը երբեք չի խուսափել նմանատիպ հանդիպումներից: Իհարկե, եթե այդ հանդիպումներից կարելի է որևէ արդյունք ակնկալել»: