Վերլուծաբանը մտահոգություն ունի, որ արտասահման մեկնող հայ պաշտոնյաներին կարող են պատանդ վերցնել

Այսօր Գյումրիի «Ասպարեզ» ակումբում կազմակերպված «Հետևություններ և դասեր ապրիլյան պատերազմից և հետո» թեմայով քննարկման ընթացքում ելույթ ունեցավ «Գլոբալիզացիայի տարածաշրջանային համագործակցություն» վերլուծական կենտրոնի խորհրդի նախագահ Ստեփան Գրիգորյանը: Նրա խոսքով` ապրիլյան պատերազմական գործողությունները ցույց տվեցին մեր թույլ և ուժեղ կողմերը: Ըստ վերլուծաբանի`ուժեղ կողմը մեր հասարակությունն է, որն անմիջապես, առանց որևէ մեկին սպասելու ինքնակազմակերպվեց և համախմբված ու իրավիճակին համարժեք պահվածք դրսևորեց, իսկ թույլ կողմը պետական ինստիտուտների արձագանքն է:

Գրիգորյանի խոսքով` ՀՀ ԱԳՆ-ն ռազմական գործողությունների և դրանց հաջորդած օրերին ոչ ադեկվատ վարքագիծ դրսևորեց: «Նախաձեռնող չենք, սպասում ենք` ինչ-որ բան պատահի, նոր մտածում ենք` արձագանքե՞նք, թե՞ ոչ: Շատ հաճախ մարդիկ չեն հասկանում պահի լրջությունը, չեն հասկանում, որ սա պատերազմ է: Մարդիկ համախմբվեցին, իսկ ինչ-որ մարդիկ էլ, ավելի կոնկրետ` պաշտոնյաներ, իրենց անձնական հարցերն են լուծում: Սա լուրջ մարտահրավեր է»,- ասաց նա:

Ի դեպ, ըստ Գրիգորյանի` չափազանց կարևոր իրողության կա, որը դուրս է մնացել տեսադաշտից: «ԱԺ-ն, կառավարությունը պետք է  բարձրաձայնեին մեր պաշտոնյաների`այլ երկրներ այցելությունների հարցը: Այսօր մեր պաշտոնյաները, ովքեր գաղտնիքի տիրապետող անձինք են, և այն պաշտոնյաները, ովքեր պաշտոնավարում են վերջին երեք-չորս տարիներին, ասես նվեր լինեն Ադրբեջանի և Թուրքիայի հատուկ ծառայությունների համար»,- ասաց նա` հավելելով. «Նրանց կարող են պատանդ վերցնել, ահաբեկել: Բազմաթիվ երկրներում որոշումներ են ընդունել, որ իրենց պաշտոնյաները, որոնք անգամ այդ պահին չեն պաշտոնավարում, այսպիսի իրավիճակներում իրավունք չունեն ոչ պաշտոնական այցով գտնվել արտասահմանում: Պատկերացնո՞ւմ եք, որ մեր պաշտոնյան, ով գնա Անթալիա` հանգստանալու, ինքն ու նրա ընտանիքը  ուղղակիորեն կդառնան թիրախ, քանի որ կրողն են ինֆորմացիայի: Սա օրինակներից մեկն է, որպեսզի ակնհայտ դառնա, որ ոչ բոլոր ինստիտուտներն են հասկանում` որքան լուրջ է իրավիճակը»:

Գրիգորյանը ևս մեկ օրինակ բերեց, որը, ըստ նրա, ևս դուրս է մնացել ուշադրությունից: «Իմ կողմից ՄԱԿ-ի Անվտանգություն խորհուրդ դիմելու առաջարկ եղավ, որ մեկ-երկու օրում հավաքվի Անվտանգության խորհրդի արտահերթ նիստ: Մերոնք դա չարեցին: Ադրբեջանն սկսեց ռազմական գործողությունները: Ակնհայտ է, որ մի քանի օրում ամեն ինչ այնպես կարվի, որ պարզ չդառնա` ով սկսեց, և մեղավորը հստակ չֆիքսվի, ու հենց մենք պետք է առաջինը դիմենք, և գլխավոր նպատակն այն է, որ առաջինը դիմենք, նրանք էլ արդարանան: Մերոնք, սակայն, դա  չարեցին, իսկ փոխարենը երեք օր առաջ Ադրբեջանը դիմեց ՄԱԿ-ի Անվտանգություն խորհրդին` ասելով, թե Հայաստանը հարձակվում է, և հենց դա է պատճառը, որ իրենք ուզում ենք միակողմանի դուրս գալ Բիշքեկյան պրոտոկոլներից, զինադադարի պրոտոկոլներից: Սա նշանակում է, որ մեր արտաքին քաղաքականությունը նախաձեռնողական չէ: Նստած սպասում են` ինչ է կատարվում, հետո  լավ նամակներ են գրում: Ի դեպ, ասեմ` Հայաստանի պաշտոնական պատասխանը փայլուն էր, բայց դա ո՞ւմ է պետք»,- եզրափակեց Գրիգորյանը: