Ընդդիմության մեջ չեմ տեսնում այն դեմքին, ում կհաջողվի համատեղել անհամատեղելին. Գուրգեն Եղիազարյան

ԱԱԾ պետի նախկին տեղակալ Գուրգեն Եղիազարյանը ցանկանում է, որ Սասուն Միքայելյանը դառնա Հրազդանի քաղաքապետ: «Սասուն Միքայելյանն իմ ընկերն է, և ես ուզում եմ, որ նա իսկապես դառնա Հրազդանի քաղաքապետ: Աստված տա` հենց այդպես լինի»,- այսօր լրագրողներին ասաց նա:

Եղիազարյանի խոսքով` ընդդիմությունը պետք է անպայման օգնի Սասուն Միքայելյանին, հակառակ դեպքում` էլ ի՞նչ ընդդիմության մասին կարող է խոսք լինել:

Նա անդրադարձավ նաև ՀԱԿ-ի որդեգրած քաղաքականությանը: «Քանի որ ես եղել եմ ՀԱԿ-ում, չէի ցանկանա քննադատել և ոչնչացնել ՀԱԿ-ին: Իհարկե, հիմա կապ չունեմ նրանց հետ, բայց և այնպես եմ մտածում, որ պետք է լավ մտածեն, թե ինչ են անում: Ես կարծում եմ, որ ՀԱԿ-ը սխալվեց`իր տեղերը Սասունին չտալով: Նրանք լուրջ սխալվեցին... ՀԱԿ-ը, այսպես վարվելով, կոպտագույն սխալ թույլ տվեց»,- ասաց Եղիազարյանը:

Yerkir.am-ի դիտարկմանը, թե ՀԱԿ խմբակցության քարտուղար Լևոն Զուրաբյանը հպարտանում է, որ հայաստանյան քաղաքական դաշտում գոյություն ունի մեկ իրական ընդդիմադիր ուժ, և, ըստ նրա ակնարկների, դա ՀԱԿ-ն է, Եղիազարյանը պատասխանեց. «Շատ դժվար է խոսել ընկերների մասին, որոնց հետ ճանապարհ ես անցել: Ես չէի ասի, որ այսօրվա դրությամբ միակ ընդդիմադիր քաղաքական ուժը ՀԱԿ-ն է, մի քանի տարի առաջ կարող էի ասել, բայց հիմա նման բան չեմ կարող ասել: Այսօր ընդդիմությունն այն ուժով օժտված չէ, ինչով օժտված էր 2008-2011 թվականներին, երբ ընդդիմությանը միավորում և ղեկավարում էր Լևոն Տեր-Պետրոսյանը»:

Նրա խոսքով` դժվար է ասել, թե այսօր Ազատության հրապարակում հավաքվածների հարաբերություններն ինչպես կդասավորվեն: «Ես տեսնում եմ, որ տարբեր հայացքների տեր մարդիկ կան այնտեղ, և չկա մեկը, ով կկարողանա միավորել նրանց: Ընդդիմության մեջ ես չեմ տեսնում այն դեմքին, ում կհաջողվի համատեղել անհամատեղելին, նույնիսկ հորիզոնում չի երևում այդ մարդը»,- նշեց Եղիազարյանը: