Հայկազի սպանության մեջ մեղադրվող կուրսանտներից երկուսը հեգնական պահվածք ունեին. Էլդա Գրին

Հայտնել ենք, որ այսօր Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով հերթական դատական նիստի ժամանակ հարցաքննվեց հայտնի փորձագետ Էլդա Գրինը: Նա բարձրացրեց այն հարցը, թե ինչո՞ւ ամբաստանյալների նկատմամբ դատաբժշկական փորձաքննություն չի նշանակվել, այլ ընդամենը նրանց լուսանկարներն են ներկայացվել փորձաքննության: Ըստ Գրինի` դա լուրջ վրիպում է, և իր պրակտիկայում առաջին դեպքն է, երբ նման ծանր գործով դատահոգեբանական փորձաքննություն չի նշանակվում:

Դատական նիստից հետո հայտնի փորձագետը մի քանի լրագրողների հետ զրույցում ներկայացրեց նիստի ընթացքում ամբաստանյալների պահվածքից իր տպավորությունները: Չցանկանալով անուններ նշել` նա ասաց, որ 4 ամբաստանյալներից երկուսն ավելի ընկճված տեսք ունեին, իսկ մյուս երկուսը` ոչ այնքան:

«Միանշանակ չենք կարող ասել, որ նրանք մասնակցել են դեպքին, բայց, բոլոր դեպքերում, այդպես է ստացվում. բոլորի պահվածքում անհանգստություն կար, բայց երկուսի մոտ հեգնական պահվածք էր»,- ասաց Գրինը:

Ըստ նրա՝ ամբաստանյալներն աշխատում էին թաքցնել իրենց վախերը: