Հայկազ Բարսեղյանի սպանության գործով կուրսանտներից բռնությամբ ցուցմո՞ւնք են կորզում

Արդեն հայտնել ենք, որ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության դեպքի առթիվ քննվող քրեական գործի նյութերով ՀՀ քննչական կոմիտեի զինվորական քննչական գլխավոր վարչությունում հարուցվել է նոր քրեական գործ` ՀՀ քրեական օրենսգրքի 375-րդ հոդվածի 1-ին մասով (իշխանության անգործությունը, որն էական վնաս է պատճառել): Այս գործով ձերբակալվել է ինստիտուտի սպա՝ կապիտան Արտյոմ Ավետիսյանը:

Անդրադառնալով սպանության դեպքի առթիվ հարուցված քրեական գործին՝ նշենք, որ կալանավորված 4 կուրսանտներն էլ իրենց մեղավոր չեն ճանաչում, ինչն էլ ավելի է բարդացնում քննիչների աշխատանքը: Շրջանառվող տեղեկությունների համաձայն` այս գործի բացահայտման ընթացքում խորթ մեթոդներ, մասնավորապես՝ բռնություններ են կիրառվել գործով մեղադրյալների և վկաների նկատմամբ: Խոսակցություններ կան, թե նրանցից մի քանիսն անգամ ստացած վնասվածքների պատճառով տեղափոխվել են հիվանդանոց:

Yerkir.am-ի հետ զրույցում գործով մեղադրյալ, պաշտոնանկ եղած՝ ինստիտուտի պետի տեղակալի որդի Գնել Թևոսյանի պաշտպան Արա Զաքարյանը հաստատեց, որ կոնկրետ իր պաշտպանյալի նկատմամբ  խորթ մեթոդներ են կիրառվել` նշելով, որ այլ մանրամասներ հայտնել չի կարող:

Նա միաժամանակ հայտնեց, որ մինչ կալանավորելն ու դրանից հետո իր պաշտպանյալի նկատմամբ որևէ քննչական գործողություն, այդ թվում՝ առերեսում չի կատարվել: Փաստաբանը նշեց, որ նման գործերով քննչական մարմինը պարտավոր էր դեպքից հետո առերեսում կատարել, սակայն մինչ այժմ, նրա խոսքով, ընդամենը երկու փորձաքննություն է նշանակվել:

Հիշեցնենք, որ Հայկազի համակուրսեցիներ Վաչե Սահակյանին, Մովսես Ազարյանին, Գնել Թևոսյանին և Նորիկ Սահակյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 7-րդ և 10-րդ կետերով՝ մի խումբ անձանց կողմից խուլիգանական դրդումներով սպանության համար: Նրանց նկատմամբ խափանման միջոց է ընտրվել կալանավորումը։ Նախաքննությունը շարունակվում է։