Սուրիկ Խաչատրյանի դեմ մահափորձի մեջ մեղադրվող Բուդաղյանի կալանքի ժամկետը հերթական անգամ երկարաձգվեց

Սյունիքի մարզպետ Սուրիկ Խաչատրյանի դեմ մահափորձի գործով մեղադրյալ Արա Բուդաղյանի կալանքի ժամկետը հերթական անգամ երկարաձգվել է ևս երկու ամսով: Բուդաղյանի պաշտպան Հայկ Ալումյանը yerkir.am-ին հայտնեց, որ դատարանի որոշումը բողոքարկել էր վերաքննիչ քրեական դատարանում, որը, սակայն, մերժել էր բողոքը: Պաշտպանի խոսքով՝ այս ընթացքում Արա Բուդաղյանի մասնակցությամբ որևէ նոր քննչական գործողություն չի կատարվել, և դեռևս խոսք չկա նախաքննության ավարտի մասին:

Նշենք, որ դեռևս չի ստացվել մահափորձի գործով մեկ այլ մեղադրյալի՝ կապանցի Գարեն Աթաջանյանի նկատմամբ նշանակված համալիր դատաբժշկական փորձաքննության արդյունքները, համաձայն որի` պետք է պարզ դառնա՝ կփոխվի՞ նրա խափանման միջոցը, թե՞ ոչ:

Ավելի վաղ հայտնել էինք, որ նախաքննական մարմինը համոզել է Աթաջանյանին՝ ցուցմունքներ տալ գործով մեղադրյալ Արա Բուդաղյանի դեմ և դրա դիմաց ազատ արձակվել: Հիշեցնենք, որ ԱԱԾ-ն այս գործով մեղադրանք է առաջադրել Սյունիքի մարզի 4 բնակչի: Մասնավորապես` Հենրիկ Ավագյանը, Գարեն Աթաջանյանը, Վիտալի Մինասյանը մեղադրվում են սպանության` պատվերով, ապօրինաբար երկու և ավելի անձանց դիտավորությամբ կյանքից զրկելու փորձ կատարելու (ՀՀ քրեական օրենսգրքի 34-104-րդ հոդվածի 2-րդ մասի 1-ին և 8-րդ կետեր), ինչպես նաև ապօրինի կերպով զենք և ռազմամթերք ձեռք բերելու, կրելու և պահելու համար (ՀՀ քրեական օրենսգրքի 235-րդ հոդվածի 1-ին մաս): Իսկ 2013-ի հունիսի 2-ին Սուրիկ Խաչատրյանի տան մոտ տեղի ունեցած կրակոցներից մահացած Ավետիք Բուդաղյանի կրտսեր եղբորը՝ Արա Բուդաղյանին, մեղադրանք է առաջադրել սպանության` ապօրինաբար մեկ ուրիշին դիտավորությամբ պատվերով կյանքից զրկելու փորձի դրդչության համար (ՀՀ քրեական օրենսգրքի 38-34-104-րդ հոդվածի 2-րդ մասի 8-րդ կետ):

Նշենք նաև, որ առաջիկայում Հայկ Ալումյանը կբողոքարկի նաև ՀՀ վերաքննիչ քրեական դատարանի՝ 2013-ի հունիսին Սյունիքի մարզպետ Սուրիկ Խաչատրյանի տան մոտ տեղի ունեցած միջադեպի գործով առաջին ատյանի դատարանի վճիռն անփոփոխ թողնելու վերաբերյալ որոշումը: