Լիսկայի դեմ մահափորձի գործով մեղադրյալին համոզում են ցուցմունք տալ Արա Բուդաղյանի դեմ. փաստաբան

Վերջին շրջանում ԱԱԾ-ն ջանքեր է գործադրում Սյունիքի մարզպետ Սուրիկ Խաչատրյանի դեմ մահափորձի գործով մեղադրյալ Արա Բուդաղյանի դեմ կեղծ ցուցմունքներ ստանալու ուղղությամբ. այսօր լրագրողներին հայտնեց Բուդաղյանի պաշտպան Հայկ Ալումյանը: Փաստաբանի խոսքով՝ նախաքննական մարմինը փորձում է համոզել գործով մեղադրյալներից Գարեն Աթաջանյանին` ցուցմունքներ տալ Արա Բուդաղյանի դեմ:

«Միշտ էլ կգտնվեն մարդիկ, ովքեր իրենց ազատության դիմաց կմրոտեն ցանկացածին»,- ասաց նա ՝ նշելով որ նախաքննական մարմինն «առևտուր» է անում մեղադրյալների հետ:

Ալումյանի խոսքով՝ ԱԱԾ-ն, ամենայն հավանականությամբ, մեղադրյալին խոստացել է դատաբժշկական փորձաքննության եզրակացության հիման վրա ազատ արձակել՝ նշելով, թե իբր նա առողջական խնդիրներ ունի:

Ըստ փաստաբանի` նախաքննական մարմինը քննություն չի տանում` ստուգելու այն վարկածը, որ հնարավոր է` Սուրիկ Խաչատրյանի դեմ մահափորձը հանցագործության իմիտացիա է, ոչ թե իրական դեպք, և մի քանի անգամ արդեն մերժել է այդ ուղղությամբ քննություն տանելու վերաբերյալ իրենց միջնորդությունները:

Yerkir.am-ի հարցին` արդյո՞ք վերահսկող դատախազը քայլեր ձեռնարկում է՝ պատշաճ նախաքննություն ապահովելու համար, Ալումյանը պատասխանեց. «Եթե գլխավոր դատախազը Գևորգ Կոստանյանն է, ով ամեն ինչ արեց, որպեսզի 2013-ի հունիսի 1-ի միջադեպի գործը չբացահայտվի, մնացած դատախազների վերահսկողության մասով խոսքն ավելորդ է»: