Պռոշյանի գյուղապետի սպանության մեջ մեղադրվողի կալանքի ժամկետը երկարաձգվեց

Երեկ Կենտրոն և Նորք-Մարաշ վարչական շրջանների ընդհանուր իրավասության դատարանը որոշում է կայացրել ևս 15 օրով երկարաձգել Պռոշյանի գյուղապետ Հրաչ Մուրադյանի սպանության մեջ մեղադրվող Արայիկ Պետրոսյանի նկատմամբ խափանման միջոց ընտրված կալանավորումը:

Նշենք, որ Արայիկ Պետրոսյանը 6 ամիս է, ինչ կալանավորված է, նրան մեղադրանք է առաջադրված ՀՀ քրեական օրենսգրքի 104-րդ հոդվածի 2-րդ մասի 2-րդ կետով և 235-րդ հոդվածի 1-ին մասով:

Yerkir.am-ի հետ զրույցում Արայիկ Պետրոսյանի պաշտպան Գիվի Հովհաննիսյանը նշեց, որ իրենք դեռ չեն ստացել համալիր փորձաքննության արդյունքները:

Հարցին` միտումնավորություն տեսնո՞ւմ է` եզրակացության ձգձգման հետ կապված, չէ՞ որ նշանակված փորձաքննությունից անցել է ավելի քան երեք ամիս, պաշտպանը պատասխանեց, որ չի կարող միանշանակ պատասխանել: Փոխարենը նա նշեց, որ մինչ այժմ իր պաշտպանյալի հետ կապված ցանկացած գործողություն կատարվել է ցանկությունների դաշտում, և բացառված չէ, որ կալանքի երկարաձգումը ևս դրա արդյունքը լինի: Հովհաննիսյանի խոսքով` իր պաշտպանյալն ակնհայտ անմեղ է և որևէ առնչություն չունի իրեն մեղսագրված արարքի հետ: