Ձեզնից հետո ջրհեղեղ չի լինելու` «ղալմաղալ» անողներ միշտ էլ կգտնվեն

Պարզվում է` Արամի 30 հասցեում գտնվող` կարմիր տուֆից շենքը քանդել են` մտածելով հասարակության մասին, առավել ևս` ծերերի և նրանց, ովքեր սայլակի օգնությամբ են տեղաշարժվում կամ սայլակով երեխայի հետ դուրս են եկել զբոսանքի: Այսօր ճարտարապետ, Արամի 30 հասցեի ետնամասում կառուցվող շինության նախագծի հեղինակ Աշոտ Ալեքսանյանը լրագրողներին հենց նման մեկնաբանություն տվեց:  Պատկերացնո՞ւմ եք` շենքը քանդել են, քանի որ մեր մասին են մտածում:

Այդ տարածքով անցնելիս մեծահասակների «ուրախությունը» պատկերացնո՞ւմ եք… Արդյո՞ք մեծահասակների մասին եք մտածում, երբ, շենքը հողին հավասարեցնելով, ջնջում եք նրանց հուշերը` փաստորեն, խլելով նրանց ջահելությունը: Տատիկս Արամի փողոցով քայլելիս հաստատ չէր նայելու, որ ոտքի տակ մեկ-երկու աստիճան կա, այլ այնտեղ գտնվող նախկին հանրախանութի հետ կապված հուշերով էր տարվելու, որտեղից, ինչպես ինքն էր ասում, կարելի էր ձեռք բերել ձայներիզներ, որոնք դեռ հեղինակներն էլ չունեին:

Ես տարիներ անց սայլակով երեխայիս հետ Արամի փողոցով զբոսնելիս պետք է նրան պատմեմ, որ տարիներ առաջ այստեղ 150 տարվա շենք կար, քանդեցին, որպեսզի ես ընդամենը կարողանամ նրա հետ այդտեղով անցնե՞լ: Ի վերջո, ամբողջ Երևանը, ես կասեի` Հայաստանը, մատչելի չէ սայլակով տեղաշարժվելու համար, ի՞նչ անենք, քանդե՞նք:

Ճարտարապետ, Երևանի ավագանու ՀՀԿ խմբակցություն անդամ Լևոն Իգիթյանն էլ ասում է. «Եթե մի ժողովուրդը նման շինությունը` «սառայը», համարում է արժեք, ցավում եմ այդ ժողովրդի համար»: Պարո\'ն Իգիթյան, ժողովրդի մասին «երրորդ դեմքով» չեն խոսում, Դուք այդ ժողովրդի մի մասնի՞կը չեք: Վստահ եմ` երբ Իգիթյանը կարդա գրածս, կասի` ո՞վ ես դու, որ ինձ ասես` ո՞նց խոսեմ: Ես ոչ ոք եմ, պարո\'ն Իգիթյան, բայց, ժողովուրդ ասելով, ինձ անպայման տեսնում եմ նրանց շարքերում: Ես շարքային ժողովուրդ եմ, որը, ցավոք, մի քիչ էլ, Փեր բառով ասած, «ղալմաղալ» անելու սովորություն ունի: Ի՞նչ արած, ուզում եմ` հետո մեզ միայն մայթերը նվեր չմնան:

«ԱՐԽկոոպ» ճարտարապետական ավեստանոցի ճարտարապետ Արսեն Կարապետյանի դիտարկմանը, թե ի՞նչ սկզբունքով են որոշում` ո՞րն է հուշարձան, ո՞րը` ոչ, ինչո՞վ է Օպերան ավելի կարևոր, քան Փակ շուկան, Իգիթյանը պատասխանում է. «Դու բարձրագույն կրթություն ունե՞ս: Ես գիտեմ տարբերությունը` Օպերայում երգում են, Փակ շուկայում` առևտուր անում»: Պարո\'ն Իգիթյան, ամենակարևորի մասին չգիտեք, բացի նրանից, որ մի վայրում առևտուր են անում, իսկ մյուսում` երգում, երկու շենքերն էլ պատմամշակութային արժեք են` ճարտարապետական գեղեցիկ լուծումներով: Թե չէ` առևտուր անելու ու երգելու շատ տեղեր կան, և նայած` Ձեզ որն է ավելի հետաքրքրում, կարող եմ լավ վայրեր առաջարկել: Զարմանալի է նաև, որ ճարտարապետի համար 150 տարվա կյանք ունեցող շենքը կարող է «սառայ» համարվել:

Ձեզնից հետո ջրհեղեղ չի լինելու, որովհետև «ղալմաղալ» անողներ միշտ էլ կգտնվեն, այլապես Արամի 30 հասցեում գտնվող շենքը գիշերը գողեգող չէին քանդի:

Ժողովրդի շարքային անդամ` Կարինե Հարությունյան