Մի հատ «սառայի» համար ղալմաղալ են բարձրացրել. Արամի 30-ում գտնվող շենքը` «խրճի՞թ»

Արամի 30 հասցեում գտնվող շենքը պատմամշակութային արժեք չուներ, այն երբեք հուշարձան չի եղել, չի կարող հուշարձան համարվել. այսօր լրագրողներին ասաց ճարտարապետ, Արամի 30 հասցեի ետնամասում կառուցվող շինության նախագծի հեղինակ Աշոտ Ալեքսանյանը:

Ըստ նրա` անհանգստությունը, թե շենքը հուշարձան է, անտեղի է. Արամի 30 հասցեն մի փոքրիկ հատված է, կղզյակ` ամբողջ այդ համալիրի կառուցապատման մեջ:

«Արամի փողոցը պատկերասրահի կողմից ունի անհարմար մայթ, որից չեն կարող օգտվել ծերերն ու սայլակով մարդիկ, քանի որ կան աստիճաններ: Մենք, այդ մասին մտածելով, նաև` տրանսպորտի վիճակը հաշվի առնելով, այսինքն` այն, որ տրանսպորտը հրապարակում «վխտում է», որոշել ենք ընդլայնել փողոցը և հեռացնել թանգարանի թիկունքից` ստեղծելով լրացուցիչ, սովորական թեք մայթ, որից կարող են օգտվել հասարակության բոլոր խավերը: Արամի փողոցը լայնանալու է` այն կլինի 7 մետր»,- ասաց Ալեքսանյանը:  

Նա նշեց նաև, որ, հաշվի առնելով հանգամանքը, որ այդտեղ ոչ մի հուշարձան չկա, իրենք ստանում են ազատություն: Ալեքսանյանը հավաստիացնում է` Արամի 30 հասցեի տարածքում ուղղակի տրանսպորտի երակ ենք ունենալու, ոչ մի կառուցապատում չի լինելու:

«Ես էլ եմ կողմնակից, որ պահպանվեն մեր շենքերը: Մենք շատ ենք վնասել Երևանին, և հիմա սթափվել ենք, մի փոքր ուշ ենք սթափվել: Բայց պետք է հասկանալ նաև, որ ոչ մի անհատական շենք մեծ միջավայրում չի կարող ապրել, նրան իրեն հարազատ միջավայր է պետք: Բարեկարգ մայթեր են լինելու այդ տեղում: Ուզում ենք` Հյուսիսային պողոտան գա, միանա հրապարակին: Պետք է տնկվեն նաև նոր ծառեր»,- ասաց Ալեքսանյանն ու հավելեց` նրանք, ովքեր չեն հավատում, կարող են գնալ և տեսնել, որ տեղում իսկապես աղբակույտ է, ոչ թե հուշարձան:

«Ամեն ինչը չէ, որ պետք է պահենք: Մենք ոչինչ չենք քանդում, մենք քանդողների բրիգադա չենք, մենք կառուցող ենք»,- նշեց նա:

Ի դեպ, տարածքի բարեկարգումը կտևի երկու տարի:

Ուշագրավ է, որ ճարտարապետը նշեց` Արամի 30 հասցեում գտնվող շենքի դիմաց գտնվող` Աբովյան փողոցի փոքր սև շենքը նույնպես պետք է ապամոնտաժվի: «Աբովյանի վրայի շենքը նույնպես ապամոնտաժվելու է, այն չի կարող մնալ Երևանում: Քաղաքի բարեկարգման նպատակով պետք է ապամոնտաժվեն դրանք: Որոշումը վաղուց կա, և ամենաճիշտ որոշումներից մեկն է»,- ասաց նա:

«ԱՐԽկոոպ» ճարտարապետական ավեստանոցի ճարտարապետ Արսեն Կարապետյանը, սակայն, համաձայն չէ Ալեքսանյանի հետ: Նրա կարծիքով` եթե մարդիկ հուշեր ունեն` կապված այդ շենքի հետ, ուրեմն այն հուշարձան է:

«Այսօրվա քաղաքաշինությունը չի համապատասխանում արդի քաղաքաշինության միտումներին, և մեզ մոտ տիրող իրավիճակն ավելի շուտ բնորոշ է միապետական համակարգին: Քաղաքաշինությունը պետք է միջավայրային լինի: Արամի 30-ում գտնվող շենքը քանդելն ընդամենը լուծման մի տարբերակ էր, լավ, թե` վատ, ձեր խղճի հարցն է, բայց որտե՞ղ են եղել տեսակետների բախումները, հասարակությունն, առհասարակ, ինչո՞ւ չի մասնակցել այդ որոշման ընդունմանը: Բացի այդ` ի՞նչ սկզբունքով են որոշում` ո՞րն է հուշարձան, ո՞րը` ոչ, ինչո՞վ է Օպերան ավելի կարևոր, քան Փակ շուկան: Անձնական նախասիրությունների դաշտի մեջ է` ի՞նչն է արժեք, ի՞նչը` ոչ, և որոշում կայացնողներն անձնական նախասիրություններով են առաջնորդվում»,- ասաց Կարապետյանը:  

Ըստ նրա` շատ գործիքներ կան, որ բոլոր այս խնդիրները կարող են լուծել: «Շատ կարծիքներ են հնչում, բայց մեկի կարծիքի հիման վրա է միշտ որոշումն ընդունվում: Վաղուց ապացուցված է` փողոց լայնացնելը տրանսպորտի հարց չի լուծում»,- նշեց Կարապետյանը:

Ճարտարապետ, Երևանի ավագանու ՀՀԿ խմբակցություն անդամ Լևոն Իգիթյանը զարմացած նշեց, որ ինքը գիտի  Օպերայի և Փակ շուկայի տարբերությունը: Ճարտարապետի մեկնաբանությամբ` «Օպերայում երգում են, Փակ շուկայում` առևտուր անում»: Իր ուշագրավ հայտարարությունից հետո Իգիթյանն անգամ Կարապետյանին հարցրեց. «Դու բարձրագույն կրթություն ունե՞ս»:

Խոսելով Արամի 30-ի մասին` նա նշեց, որ պատահական ոչ մի բան չի արվում, և եթե մի ժողովուրդ նման շինությունը համարում է արժեք, ինքը ցավում է այդ ժողովրդի համար:

«Ես թերթ-մերթերից գլուխ չեմ հանում, չեմ կարդում, բայց ուզում եմ ասել, որ եթե մենք հոգևոր տեսակետից այդքան աղքատ չենք, խրճիթի համար այդքան աղմուկ չեն հանում: Եթե ԱՕԿՍ-ի, Աֆրիկյանների, ԵՊՀ-ի հին շենքին կպնեն, ես կգնամ` կկանգնեմ այնտեղ: Ես մինչև հիմա չեմ հասկացել` հայերի արժեքը ո՞րն է: Զվարթնոցի մասին խոսեք, Հռիփսիմեի մասին խոսեք, եթե ուզում եք մի բանի համար պայքարեք` լավ թիրախ ընտրեք, գնացել` էդ սառայից (сарай) եք կպել: Հասկանում եմ` երիտասարդները ղալմաղալ անելու, ընդդիմադիր երևալու ցանկություն ունեն»,- ասաց Իգիթյանը:

Երևանի ավագանու «Բարև Երևան» խմբակցության անդամ Անահիտ Բախշյանը նշեց, որ համամիտ է Կարապետյանի հետ`  որտեղ հուշ կա, չի կարող հուշարձան չլինել այնտեղ: Նա նաև հիշեցրեց, որ 2007-ին Սրամի 30-ին հարակից տարածքը գերակա շահ է սահմանվել:

«Աֆրիկյանների շենքը վերացրին, Արամ Մանուկյանի տան ֆասադն է միայն մնացել: Սա մեր պատմությունն է, ու ի՞նչ ենք անում պատմության հետ: Պարո\'ն Իգիթյան, Դուք թերթ չեք կարդում, ջղայնանում եք, որ երիտասարդները բողոքում են, բայց եթե ժամանակին երիտասարդների  բողոքը լսեին, Ձեր նշած` Աֆրիկյանների շենքն էլ կպահպանվեր: Հասկացեք` հասարակությունը չի կարող զարգանալ առանց բողոքների»,- ասաց Բախշյանը: