Տնկիները կգտնվեն իրավապահների հսկողության տակ

Այս տարի մայրաքաղաքում կստեղծվեն նոր այգիներ, պուրակներ ու կանաչ գոտիներ: Այդ նպատակով, ըստ Երևանի քաղաքապետարանի աշխատակազմի բնապահպանության վարչության պետ Ավետ Մարտիրոսյանի, Հոլանդիայից ներկրվել է 450 հազար ծաղկասածիլ, որոնք մեկ ամիս ջերմոցներում աճեցվելուց հետո կբաժանվեն վարչական շրջաններին: Բացի այդ` Իրանից բերվել են 4000 մշտադալար դեկորատիվ ծառեր ու թփեր:

Ա. Մարտիրոսյանի խոսքերով` մայրաքաղաքի վարչական շրջաններում արդեն մեկնարկել է ծառատունկը, ընդ որում` ընտրվել են այնպիսի ծառատեսակներ, որոնք հողից կլանում են ծանր մետաղները:

Նա անդրադարձել է նաեւ տնկիների գողության դեպքերին` նշելով, որ այդ արատավոր երեւույթը կանխելու համար Երևանի քաղաքապետ Կարեն Կարապետյանի խնդրանքով իրավապահ մարմինները հսկողություն են սահմանելու: