Եթե ՀԱԿ-ը ընտրատեղամասերում չկարողացավ մարդիկ ունենալ, էլ ումի՞ց ի՞նչ է ուզում. ՀՀԿ-ական պատգամավոր

 ՀԿ-ական պատգամավոր Սուքիաս Ավետիսյանը Yerkir.am-ի զրույցում, անդրադառնալով ՀԱԿ խմբակցության՝ Սահմանադրական դատարանին ուղղված՝ սահմանադրական բարեփոխումների հանրաքվեն անվավեր ճանաչելու վերաբերյալ ստորագրահավաք ձեռնարկելու նախաձեռնությանը, նշեց, որ Հայ ազգային կոնգրեսը չունի համապատասխան թվով կողմնակիցներ:

«Էդ ստորագրահավաքից առաջ կար մի փուլ, որ նրանք պետք է մոբիլիզացնեին իրենց ուժերը և ընտրատեղամասերում մարդիկ ունենային: Եթե ընտրատեղամասերում չկարողացան մարդիկ ունենալ, էլ ումի՞ց ի՞նչ են ուզում: Թող թեկուզ տասը պատգամավոր միանա նրանց ստորագրահավաքին, խնդիրը դա չէ, խնդիրն այն է, որ ՀԱԿ-ը հասկանա` ինչ է ուզում»,- ասաց ՀՀԿ-ականը` հավելելով, որ ՀԱԿ-ը եթե ուզում էր ամեն ինչը հստակ ունենալ իր ձեռքի տակ, կարող էր բոլոր ընտրատեղամասերում ունենալ մարդիկ և ոչ թե ինչ-որ թվաբանական գործողություններից խոսել:

«Հիմա հետին թվով ինչի՞ մասին է խոսքը, ի՞նչ է ուզում ՀԱԿ-ը, անհասկանալի են արդեն նրանց գործողությունները»,- ասաց պատգամավորը: