Ինչո՞ւ էքստրասենսի սպանության մեջ մեղադրվողի նկատմամբ քննչական գործողություններ չեն կատարվում

Էքստրասենս Անի Մաջնունյանի սպանության մեջ մեղադրվող Մուշեղ Մխիթարյանի շահերն այսուհետ ներկայացնելու է Հանրային պաշտպանի գրասենյակի փաստաբան Մարինե Ֆարմանյանը: Նա yerkir.am-ի հետ զրույցում հայտնեց, որ նոր է ծանոթացել քրեական գործի նյութերին, իսկ այսօր էլ տեսակցելու է իր պաշտպանյալին: Ֆարմանյանը նշեց, որ իր պաշտպանյալն իրեն մեղավոր չի ճանաչում: Ըստ նրա` ներկայումս Մուշեղի նկատմամբ քննչական գործողություններ չեն կատարվում, մինչև իր կողմից գործի վերաբերյալ ամբողջական պատկերացում կազմելը:

Հիշեցնենք, որ 2015թ. օգոստոսի 5-ին Երեւանի Մազմանյան 5 շենքի թիվ 20 բնակարանում հայտնաբերվել է «6-րդ զգայարան» հաղորդաշարի էքստրասենս` 53-ամյա Անի Մաջնունյանի դին՝ բազմաթիվ ծակած-կտրած վնասվածքներով: Դեպքի առիթով Աջափնյակ եւ Դավթաշեն վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 104 հոդվածի 2-րդ մասի 8-րդ կետով (սպանություն՝ զուգորդված ավազակությամբ): Մեղադրանք է ներկայացված 20-ամյա Մուշեղ Մխիթարյանին, նա կալանավորված է: Մխիթարյանը «Յանուս» թատրոնի գեղարվեստական ղեկավարն է: