Պերմյակովն ագրեսիվ վարք չունի. ռուսական կողմը դատարանում նոր փաստեր հրապարակեց

Գյումրիում տեղակայված 5-րդ կայազորային ռազմական դատարանում այս պահին շարունակվում է Ավետիսյանների ընտանիքի 7 անդամների սպանության մեջ մեղադրվող ռուսական 102-րդ ռազմաբազայի զինծառայող Վալերի Պերմյակովի դասալքության գործով դատական նիստը: Դատախազը քիչ առաջ հրապարակեց  Պերմյակովի գործով եղած ապացույցները:

Մանավորապես դատահոգեբուժական, դատահոգեբանական համալիր փորձաքննության եզրակացությունները, համաձայն որի` Պերմյակովի մոտ հոգեկան առողջության հետ կապված խնդիրներ չկան: Նա ագրեսիվ վարք և թմրանյութերից կախվածություն չունի և պիտանի է ծառայությանը: Հրապարակվեցին նաև Պերմյակովին պատկանող ինքնաձիգի փորձաքննության արդյունքները, որոնք ռուսական կողմը ձեռք էր բերել հայկական կողմից: Հիշեցնենք, որ դեպքից հետո դեպքի վայրում հայտնաբերված ինքնաձիգն առգրավվել էր հայ քննիչների կողմից:

Yerkir.am-ի հետ զրույցում Ավետիսյանների իրավահաջորդների ներկայայցուցիչ Երեմ Սարգսյանը հայտնեց, որ ընթացող դատական նիստը տպավորություն է ստեղծու, թե ռուսական կողմն ամեն կերպ փորձում է հնարավորինս արագ քննել և ավարտել գործը: Որոշ դեպքերում քննությունը ձևական բնույթ է կրում: Իրավահաջորդների ներկայացուցիչներից Լուսինե Սահակյանը համակարծիք էր այն մտքի հետ, որ դատավարության բոլոր կողմերը փորձում են շտապ ավարտել քննությունը:

Փաստաբանը հայտնեց, որ այսօր դատարանում հրապարակվեցին բազմաթիվ տվյալներ, որոնք իրենց համար նոր էին և գործի համար էական նշանակություն ունեն: Անդրադառնալով դատահոգեբանական և դատահոգեբուժական փորձաքննության արդյունքներին, որով Պերմյակովը մեղսունակ է ճանաչվել, փաստաբանը հայտնեց, որ իրենք միջնորդելու են, որպեսզի հայկական կողմը փորձաքննություն անցկացնի: Դատարանը 40 րոպեով ընդմիջում է հայտարարել, որից հետո դատախազը հանդես կգա մեղադրական ճառով: