Պերմյակովն իրեն մեղավոր ճանաչեց և հրաժարվեց ցուցմունք տալ

Արդեն հայտնել ենք, որ այսօր Գյումրիում տեղակայված 5-րդ կայազորային ռազմական դատարանում մեկնարկեց Ավետիսյանների ընտանիքի 7 անդամների սպանության մեջ մեղադրվող ռուսական 102-րդ ռազմաբազայի զինծառայող Վալերի Պերմյակովի դասալքության մասով գործը։ 

Ինչպես Գյումրիից տեղեկացնում է Yerkir.am-ի թղթակիցը, դատական նիստը նախագահում է ռուսական ռազմական դատարանի դատավոր Ալեքսանդր Շելդյաևը: Պերմյակովի շահերը պաշտպանում է փաստաբան Դանիելյանը: Դատական նիստի ընթացքում հայտնի դարձավ, որ գործով վկա, Պերմյակովի ծառայակից Խաչատրյանը արձակուրդում է և որոշում կայացվեց հրապարակել նրա նախաքննական ցուցմունքը:

Քիչ առաջ մեղադրողը հրապարակեց մեղադրական եզրակացությունը: Վալերի Պերմյակովը հայտարարեց , որ իրեն ամբողջությամբ մեղավոր է ճանաչում: Նրա պաշտպանն էլ հայտնեց, որ Պերմյակովը հրաժարվում է ցուցմունք տալ և մեղադրողի հարցերին պատասխանել: