Բիզնես ոլորտի խնդիրներն են ԱԱՀ վերադարձման և ծագման սերտիֆիկատի պահանջի խնդիրը. էկոնոմիկայի փոխնախարար

Ասօր էկոնոմիկայի նախարարությունում տեղի է ունեցել արդյունաբերական համաժողով, որի քննարկման թեման ԵՏՄ անդամ պետությունների արդյունաբերական համագործակցության հիմնական ուղղություններն էին: Ըստ այդմ` ներկայացվել է ԵՏՄ  անդամ պետությունների արդյունաբերական համագործակցության հիմնական ուղղությունների նախագիծը:

Էկոնոմիկայի փոխնախարար Էմիլ Տարասյանը լրագրողների հետ զրույցում անդրադարձել է այն խնդիրներին, որոնց բախվեց Հայաստանի բիզնես ոլորտը ԵՏՄ-ին անդամակցելուց հետո: Նա նշել է, որ այդ խնդիրները հիմնականում կապված են տարանցիկության և մի շարք տեխնիկական հարցերի հետ:

«Այդ խնդիրներն են, մասնավորապես,  ԱԱՀ վերադարձման հետ կապված խնդիրը, երբ երկակի հարկում է տեղի ունենում, և անհրաժեշտ է մեխանիզմներ գտնել դրանից խուսափելու համար: Եվս մեկ խնդիր է ծագման սերտիֆիկատի պահանջը, որն, ըստ էության, դուրս է եկել, բայց որոշ տեղերում դեռ պահպանվում է, ինչն անօրինական է և վարչական խոչընդոտներ է ստեղծում: Նաև` նմանատիպ այլ խնդիրներ, որոնք ԵՏՄ հանձնաժողովը հակված է լուծել, որովհետև գրեթե բոլոր հարցերում հայկական կողմը ստացել է աջակցություն նույն հանձնաժողովի կողմից»,- ասել է նա:

Էմիլ Տարասյանի խոսքով` բոլոր` բիզնեսին խոչընդոտող խնդիրների մասին  բաց և հրապարակային պետք է խոսվի հենց համաժողովի ընթացքում, և հայկական կողմը հույս ունի, որ այդ հարցերի պատասխանները կտրվեն, իսկ եթե այդ հարցերի պատասխանները չտրվեն համաժողովի ընթացքում,  ապա հայկական կողմը կխնդրի, որ լուծումներ տրվեն ԵՏՄ հանձնաժողովի կողմից` դրանք օրակարգ մտցնելով: