Հրաժարականի պահանջի տակ լուրջ հիմնավորումներ չկան. ԿԳ նախարարը` Անահիտ Բախշյանի պահանջի մասին

ՀՀ ԿԳ նախարար Լևոն Մկրտչյանի կարծիքով` պետք է շատ լուրջ հիմնավորումներ ունենալ նախարարի հրաժարականը պահանջելու համար, իսկ Երևանի ավագանու «Ելք» խմբակցության անդամ Անահիտ Բախշյանի այդ պահանջի տակ հիմնավորումներ չկան: Լրագրողների հետ զրույցում նախարարն այսպես արձագանքեց հարցին` ինչպե՞ս է վերաբերվում Անահիտ Բախշյանի` իր հրաժարականի մասին պահանջին։

Մեկ այլ հարցի`արդյո՞ք չի պատրաստվում հրաժարական տալ, նախարարը պատասխանեց` ոչ: «Նրա իրավունքն է, թող պահանջի: Ինչո՞ւ պիտի հրաժարական տամ: Իսկ եթե մեկը հավաքի 3000 ստորագրություն ու ասի` իմ մաշկի գույնը ուրիշ է, ձերը մի քիչ ուրիշ, հրաժարական տուր, պիտի քննարկե՞նք այդ հարցը»,- ասաց նա։ 

Հիշեցնենք, որ Բախշյանը պահանջել էր ԿԳ նախարարի հրաժարականը Հրազդանի քաղաքապետի որդուն ԿԳ նախարարության կողմից բարձր առաջադիմության համար մեդալ շնորհվելուց հետո: