Արտահանող գինեգործների համար ԱԱՀ-ի վերադարձման ժամկետը կկրճատվի

Այսօր կառավարության նիստում վարչապետ Կարեն Կարապետյանը հանձնարարական տվեց գինեգործության և խաղողագործության ոլորտի արտահանումների ավելացված արժեքի հարկի վերադարձման ժամկետների վերաբերյալ: Վարչապետի խոսքով` ներկայումս գործող կարգավորումների համաձայն, արտադրանքի արտահանման ժամանակ ԱԱՀ-ի վերադարձն իրականացվում է 90-օրյա ժամկետում, որը կարող է որոշակի դժվարություններ ստեղծել արտահանողների համար:

Ելնելով վերոնշյալ խնդրից` վարչապետը հանձնարարեց ՊԵԿ նախագահին` երկօրյա ժամկետում ուսումնասիրել և կառավարության աշխատակազմին ներկայացնել առաջարկություն խաղողի վերամշակմամբ զբաղվող ընկերությունների կողմից արտահանման դեպքերում ԱԱՀ-ի վերադարձն ավելի կարճ ժամկետներում կազմակերպելու վերաբերյալ:

Նա դիմեց գյուղնախարարին. «Պարո'ն Առաքելյան, ՊԵԿ-ին ներկայացնում եք արտահանողների ցուցակը»:

Ապա դիմեց ՊԵԿ նախագահին. «Պարո'ն Հարությունյան հատուկ ռեժիմ եք սահմանում այս մթերման ժամանակահատվածում: Նրանց համար ստեղծել ենք  3 տոկոսանոց դրամային վարկային ռեսուրս, որ մթերումն անցկացնենք մաքսիմալ արագ և արդյունավետ»: