Ամեն ինչը ՀԷՑ-ի վրա գցելը ճիշտ չէ. ՀՀԿ-ական պատգամավոր

ՀՀԿ խմբակցության պատգամավոր Լեռնիկ Ալեքսանյանն այսօր լրագրողների հետ զրույցում անդրադարձավ էլեկտրաէներգիայի սակագնի հնարավոր բարձրացմանը և ՀԷՑ-ի ծավալած գործունեությանը:

«Մենք փակ նիստ ունեցանք, որովհետև դեռ ինքներս պետք է հասկանայինք` ինչ է կատարվում: Ողջ էներգահամակարգը բաղկացած է էներգաարտադրողներից և էներգիան իրացնողներից: Ամեն ինչը ՀԷՑ-ի վրա գցելը ճիշտ չէ: Ամբողջ խնդիրն այն է, որ եղած գումարները պետք է նպատակային օգտագործվեն»,- ասաց նա:

Հարցին, թե, ի վերջո, էլեկտրաէներգիան թանկանալո՞ւ է, և որքա՞ն թանկացում է նախատեսվում, Լեռնիկ Ալեքսանյանը պատասխանեց. «Ես դա չեմ կարող ասել: Ռոբերտ Նազարյանի հանձնաժողովը կհայտարարի` հնարավո՞ր է, թե՞ ոչ: Մենք միայն կարող ենք քաղաքական գնահատականներ տալ: Իմ կարծիքով` ՀԷՑ-ում տեխնիկական վերազինման վրա պետք է կենտրոնանալ: Ունեցած գումարները պետք է նպատակային ծախսել: ՀԷՑ-ը կարող էր գումարներ ծախսել սրա վրա, ոչ թե ուրիշ, ոչ պետքական ծախսեր անել»,- ընդգծեց պատգամավորը: