Ամբողջ ֆայլաբազարը կգնա այս մեխանիզմով. Արամ Մանուկյան

Այսօր ԱԺ արտահերթ նիստում երկրորդ ընթերցմամբ քննարկվեց կառավարության ներկայացրած այն օրենքի նախագիծը, որը արտերկրում շինարարության ոլորտում աշխատող կազմակերպությունների ու վարձու աշխատողների համար սահմանում է եկամտահարկի ու շահութահարկի դրույքաչափեր:

ԱԺ նախագահի տեղակալ Էդուարդ Շարմազանովը խնդրեց ֆինանսների փոխնախարար Վախթանգ Միրումյանին` ևս մեկ անգամ հայտարարել, որ այդ օրենքը խոպանչիների համար չէ: Փոխնախարարը դա հաստատեց:

ԱԺ ՀԱԿ խմբակցության պատգամավոր Արամ Մանուկյանը նշեց, որ այդ օրենքը մանրամասն պետք է քննարկվեր, ոչ թե բերվեր հապճեպ ընթացակարգով:

«Մեր մտահոգությունը արտագաղթն է, որովհետև Հայաստանում գրանցվելը նշանակում է նաև ապահովվածություն, որոշակի երաշխիքներ, ինչը կնպաստի արտագաղթին: Հայաստանում կա 73 հազար գործազուրկ, նրանց մի մասը, քանի որ երաշխավորված է, կգնա այս մեխանիզմով: Օրինակ՝ ֆայլաբազարը, որտեղ հավաքվող մարդիկ համաձայն են ցանկացած աշխատանքի: Ամբողջ ֆայլաբազարը կգնա այս մեխանիզմով Հայաստանից դուրս»,- ասաց պատգամավորը:

Նրա խոսքով` սկզբում կարծում էր, որ ռուսները կդժգոհեն այդ օրենքից, բայց հիմա մտածում է, որ Ռուսաստանի համար շատ կարևոր երկու խնդիր է լուծվելու` առաջին՝ դեմոգրաֆիկ խնդիր, երկրորդ՝ աշխատուժի խնդիր:

«Ռուսները դեմ չեն, որ այս օրենքը մեզ մոտ աշխատի, արդյունքում` հինգ տոկոսով, թե տասը տոկոսով, բայց արտագաղթին օրենքը նպաստելու է: Եթե հինգ հազար մարդ կամ տասը հազար մարդ գնա, ամուսնանա, ռուսների հետ ապրի ու մնա Ռուսաստանում, դա մեզ համար թիվ է ու կորուստ, այսինքն` դա կնպաստի արտագաղթին»,- ասաց Արամ Մանուկյանը: