Կդառնանք ձայնազուրկ մեխանիզմով մի ինչ-որ սեփականություն. Թևան Պողոսյան

ԱԺ-ում լրագրողների հետ զրույցում, խոսելով «ՀայՌուսգազարդի»՝ կառավարությանը պատկանող քսան տոկոս բաժնեմասը «Գազպրոմին» վաճառելու մասին, «Ժառանգություն» խմբակցության պատգամավոր Թեւան Պողոսյանը նշեց, որ շատ բացասական է վերաբերվում այդ փաստին:

«Հայաստանը պետք է կարողանա առաջինը` ունենալ իր ձայնի իրավունքը ցանկացած որոշման ժամանակ: Չունենալով սա` մենք դառնում ենք ձայնազուրկ մեխանիզմով մի ինչ-որ սեփականություն տվյալ տարածքում, որը կարող է մի օր բռնեն` այնպես ծռեն, որ մենք չկարողանանք խոսել: Այդ ժամանակ նրանք կասեն, որ սեփականատերեր են եւ իրավունք ունեն ամեն ինչ անելու»,- ասաց նա:

ԲՀԿ խմբակցության պատգամավոր Միքայել Մելքումյանն էլ նշեց, որ, բաժնետիրական ընկերությունների մասին օրենքի համաձայն, եթե սուբյեկտը 2/3-րդ-ից պակաս ձայն ունի, դա կարող է տալ ընդամենը մի քանի հնարավորություն, օրինակ` տնօրենների խորհրդում ունենալ անդամ, ինչը շատ փոքր հնարավորություն է: Ընդհանուր առմամբ, Մ. Մելքումյանը կողմ չէ, որ վաճառվեց քսան տոկոս բաժնետոմսը: