Չավուշօղլուն CNN-ին չի կարողացել պատասխանել, թե ինչու չեն ճանաչում Ցեղասպանությունը

Թուրքիայի ԱԳ նախարար Մևլութ Չավուշօղլուն անհարմար վիճակում է հայտնվել ամերիկյան CNN հեռուստաընկերության լրագրողների հետ հարցազրույցի ժամանակ՝ չկարողանալով պատասխանել հարցին, թե ինչո՞ւ Թուրքիան չի ճանաչում Հայոց ցեղասպանությունը:

Թուրքիայի ԱԳ նախարարը, կրկնելով, որ իրենք ընդունում են, որ 1915 թվականին եղել են դեպքեր, որոնց ընթացքում մահացել են հայեր, ասել է. «Մենք չեն հերքում, որ եղել են դեպքեր և մահացել են հայեր, և` ոչ միայն: Սակայն դա ցեղասպանություն անվանել չենք կարող: Այս իրադարձությունների ընթացքում մահացել են բազում թուրքեր, մուսուլմաններ: 1915 թվականի իրադարձությունները «ցեղասպանություն» կոչելը ճիշտ չէ, քանի որ այն իրավաբանական եզրույթ է»:

Չավուշօղլուի պատասխանն, ըստ երևույթին, չի բավարարել լրագրողին, ով նշել է, որ մեկուկես միլիոն հայերի սպանությունը համապատասխանում է «ցեղասպանություն» բառի սահմանմանը: Ի պատասխան, Թուրքիայի ԱԳ նախարարը կրկնել է. «Մենք չենք ժխտում, որ շատ մարդիկ են զոհվել, սակայն մենք այն ցեղասպանություն անվանել չենք կարող»: