Փայլանի կուսակցությունը CNN-ի թուրքական ծառայության դեմ բողոք է ներկայացրել CNN-ին

Թուրքիայի քրդամետ Ժողովուրդների դեմոկրատական կուսակցությունը CNN-ի թուրքական ծառայության գործունեության մասին բողոք է ներկայացրել CNN-ին:

Կուսակցության համանախագահների ձերբակալությունից հետո CNNTurk-ի եթերում քննարկում էր տեղի ունեցել, որի ընթաղքում ԺԴԿ պատգամավորը ցանկացել էր հեռախոսազանգով միանալ քննարկմանը, սակայն մերժվել էր: Փոխարենը քննարկմանն էր միացել Էրդողանի կուսակցության պատգամավորը, ինչը դժգոհության ալիք էր բարձրացրել ԺԴԿ-ականների շրջանակում:

Ըստ Demokrathaber-ի՝ CNN-ին ուղղված նամակում քրդամետ կուսակցությունն առանձնահատուկ շեշտել է թուրքական ծառայության կեցվածքի մասին՝ հարց ուղղելով՝ «իրենք տեղյա՞կ են այդ ամենից, թե՞ ոչ»: Նամակում շեշտվել է նաև այն հանգամանքը, որ, իրենց խոսք չտալով, հեռուստաալիքը, կամա, թե ակամա, օգնում է իրականացնել Էրդողանի կուսակցության քարոզչությունը համանախագահների ձերբակալության հարցում: