Ըստ Վահան Բաբայանի՝ Ծառուկյանի մասին բամբասում են

Արդեն տևական ժամանակ է՝ մամուլում շրջանառվում են տեղեկություններ, թե Գագիկ Ծառուկյանը ԲՀԿ շտաբներից պահանջում է վերադարձնել իր միջոցներով ձեռք բերված գույքը:

ԲՀԿ մամուլի խոսնակ Վահան Բաբայանը Yerkir.am-ի հետ զրույցում նշեց, որ այդ ամենն ապատեղեկատվություն է և անհեթեթություն: «Այդ տեղեկություններն անհեթեթություններ են և ապատեղեկատվություն: Նման լուրեր տարածողներին խորհուրդ եմ տալիս զբաղվել ավելի լուրջ գործերով»,- ասաց նա:

Անդրադառնալով նաեւ այն լուրերին, թե ԲՀԿ նախկին նախագահ Գագիկ Ծառուկյանը Սերժ Սարգսյանին երդվել է, որ փակելու է «Բարգավաճ Հայաստան» կուսակցությունը, և այդ հանգամանքից ելնելով` շատերը հենց նրա հրահանգով են լքում ԲՀԿ-ն, Բաբայանը նշեց. «Նման բամբասանքի մակարդակի խոսակցություններին ես չեմ անդրադառնում և չեմ մեկնաբանում»:

Մեր դիտարկմանը, թե չի է՞լ բացառում, որ նման բան եղել է, պատասխանեց. «Ես բամբասանքներին չեմ արձագանքում, ես ԲՀԿ-ի մամուլի խոսնակն եմ և լիազորված եմ խոսել այն հարցերից, որոնք վերաբերում են «Բարգավաճ Հայասատան» կուսակցությանը: Եվ նման որակի բամբասանքները, որոնք տարածվում են Գագիկ Ծառուկյանի վերաբերյալ, ես ընդհանրապես չեմ մեկնաբանի, որովհետև դրանք անհեթեթություններ են»: