Ներկուսակցական խնդիր է. Նաիրա Զոհրաբյանը՝ Վահան Բաբայանի հրաժարականի մասին

Այսօր ԲՀԿ խմբակցության պատգամավոր Վահան Բաբայանը, ով նաև ԲՀԿ խոսնակի պարտականություններն էր կատարում, հայտարարեց, որ հրաժարվում է այդ պաշտոնից:

Yerkir.am-ի հետ զրույցում ԲՀԿ ղեկավար Նաիրա Զոհրաբյանը նշեց, որ այսօր է Վահան Բաբայանն ասել այդ մասին: «ԲՀԿ խմբակցությունը հարգում է նրա այդ որոշումը, առաջիկայում մենք մեր հարգարժան գործընկերներին կներկայացնենք ԲՀԿ նոր խոսնակի անունը»,- ասաց նա:

Հարցին, թե ո՞րն էր հրաժարականի պատճառը, Նաիրա Զոհրաբյանը պատասխանեց. «Դա մեր ներկուսակցական խնդիրն է, չեմ կարծում, որ դա պետք է լինի մամուլի քննարկման առարկա»:

Ճշտող հարցին, թե արդյո՞ք դա կապ ունի իշխանության հետ կոալիցիա կազմելու հարցի հետ, նա կրկնեց. «Ես պատասխանեցի, որ դրանք մեր ներկուսակցական խնդիրներն են»:

Հիշեցնենք, որ ԱԺ-ում ակտիվորեն լուրեր են շրջանառվում, որ ԲՀԿ-ում կրքեր են բորբոքվել` ՀՀԿ-ի հետ կոալիցիա չկազմելու մեղավորներին են փնտրում: