«ԱրմենՏելի» նախկին բարձրաստիճան պաշտոնյան կալանավայրում է. ԱԱԾ

ԱԱԾ վարույթում քննվող` «ԱրմենՏել»-ի բարձրաստիճան պաշտոնյաների կողմից կատարված չարաշահումների փաստով հարուցված քրեական գործով մեղադրյալ, «ԱրմենՏել» ընկերության  տեխնիկական բլոկի նախկին տնօրենի` ՌԴ քաղաքացի Վլադիմիր Սաչկովը Հայաստանում է: Այս մասին yerkir.am-ի հարցմանն ի պատասխան հայտնեցին ԱԱԾ մամուլի կենտրոնից` նշելով, որ Սաչկովն այժմ գտնվում է քրեակատարողական հիմնարկում:

Նշենք, որ նրա նկատմամբ հետախուզում էր հայտարարված դեռևս նախորդ տարվանից: Սաչկովը ձերբակալվել է 2014-ի մայիսին` Բելառուսում, իսկ օրեր առաջ տեղեկություններ տարածվեցին, որ Բելառուսը նրան արտահանձնել է Հայաստանին:

Հիշեցնենք, որ քրեական գործի շրջանակներում Սաչկովը որպես մեղադրյալ է ներգրավվել ՀՀ ՔՕ` միանգամից 4 հոդվածներով: Մասնավորապես` նրան մեղադրանք է առաջադրվել ՀՀ քրեական օրենսգրքի 188-րդ հոդվածի 3-րդ մասի 1-ին և 2-րդ կետերով (Ապօրինի ձեռնարկատիրությունը, որը կատարվել է կազմակերպված խմբի կողմից, զուգորդվել է անձանց կամ կազմակերպություններին կամ պետությանն առանձնապես խոշոր չափի վնաս պատճառելով), 214-րդ հոդվածի 2-րդ մասով(Առևտրային կամ այլ կազմակերպությունների ծառայողների կողմից լիազորությունները չարաշահելը, որն առաջացրել է ծանր հետևանքներ), 252-րդ հոդվածի 2-րդ մասի 3-րդ կետով (մի խումբ անձանց կողմից նախնական համաձայնությամբ` պաշտոնեական դիրքն օգտագործելով համակարգչային տեղեկատվությունը փոփոխելը) և 253-րդ հոդվածի 1-ին մասով (համակարգչային սաբոտաժը):

Գործի նախաքննությունը շարունակվում է: