Ծաղկաձորում հայտնաբերվել է ''ԱրմենՏելի'' կոմերցիոն տնօրենի դին

Փետրվարի 2-ից ոստիկանության Հրազդանի բաժնի և Ծաղկաձորի ոստիկանության ծառայողները, Կոտայքի մարզի հրշեջ-փրկարարական ջոկատը, Ծաղկաձորում գործող ճոպանուղու անձնակազմը որոնողական աշխատանքներ էին իրականացնում, քանի որ տեղեկություններ էին ստացվել, որ մի քաղաքացի անհետ կորել է. գրում է shamshyan. com-ը: Ըստ ֆոտոլրագրող Գագիկ Շամշյանի`այսօր որոնողական աշխատանքների արդյունքում Ծաղկաձորի սպորտբազայի մոտ գտնվող «Թթուջուր» կոչվող տարածքում հայտնաբերվել է 35-ամյա Արչիլ Մաղրաձեի դին: Նա աշխատում էր «ԱրմենՏել» ՓԲԸ-ում՝ որպես կոմերցիոն տնօրեն:

Թե ի՞նչն է եղել Մաղրաձեի մահվան պատճառը, կպարզվի դիակի դատաբժշկական փորձաքննությունից հետո: Ֆոտոլրագրողը հայտնում է նաև, որ ճոպանուղու մոտ հայտնաբերվել է Ա. Մաղրաձեին պատկանող Hyundai մակնիշի 010 ԼՕ 03 համարանիշով ավտոմեքենան: