Լինելու եմ խստապահանջ. Հովիկ Աբրահամյան

Այսօր կառավարության նիստում օրակարգին անցնելուց առաջ ՀՀ վարչապետ Հովիկ Աբրահամյանը եւ կառավարության անդամները մեկ րոպե լռությամբ հարգեցին Գյումրիում կատարված ոճրագործության զոհերի հիշատակը:

Օրակարգը սկսեց զեկուցել կառավարության աշխատակազմի ղեկավար-նախարար Դավիթ Հարությունյանը` կառավարության 2013 թվականի հոկտեմբերի 3-ի N 1078-Ա որոշման մեջ լրացում և փոփոխություն կատարելու մասին հարցով: Հովիկ Աբրահամյանը նախ նշեց, որ ակնկալում է կառավարության անդամներից ավելին, քան կա:

«Ակնկալում եմ նախաձեռնողականություն, սրտացավություն և նախանձախնդրություն: Մենք ունենք շատ խնդիրներ, և յուրաքանչյուր գերատեսչության ղեկավար պատասխանատու է ոչ թե թղթին հանձնված իր ծրագրի, այլ իր ոլորտի տնտեսական աճի, ստեղծված արդյունքի, զբաղվածության, հարկերի համար»,- ասաց վարչապետը և հավելեց, որ նախաձեռնողականության հետ մեկտեղ ակնկալում է որակ և, ամենակարևորը, կարգապահություն:

«Ակտիվ նախաձեռնողականություն, բայց, միեւնույն ժամանակ, հում, չմշակված փաստաթղթեր մեզ անհրաժեշտ չեն: Լինելու եմ խստապահանջ, և նախապես մանրամասն չքննարկված փաստաթղթերին ընթացք չի տրվելու: Մենք պետք է արդյունք ապահովենք, և ժողովուրդը մեր աշխատանքի արդյունքները պետք է տեսնի»,- ասաց վարչապետը: