Րաֆֆի Հովհաննիսյանին պաշտոն չի առաջարկվել. Հովիկ Աբրահամյան

ՀՀԿ ԳՄ նիստի ավարտից հետո, ի պատասխան Yerkir.am-ի հարցի, ԱԺ նախագահ, ՀՀԿ շտաբի պետ Հովիկ Աբրահամյանն այդպես էլ չասաց, թե տեղյա՞կ է Սերժ Սարգսյանն-Րաֆֆի Հովհաննիսյան այսօրվա հանդիպման մանրամասներին, բայց հավանական չհամարեց 2008թ.-ի դեպքերի կրկնությունը, ավելին` համոզմունք հայտնեց, որ Րաֆֆի Հովհաննիսյանը նման ցանկություն չունի: Աբրահամյանը նախ հորդորեց նման բաներ չմտածել, հետո էլ նշեց, որ կյանքը, ժամանակը ցույց կտա, թե ինչպես կընթանան զարգացումները:

«Ընտրություններն անցել են շատ լավ, այս ընտրությունները խորհրդարանական ընտրություններից մեկ քայլ առաջ էին: Որեւէ կոնկրետ դժգոհություն չկա, որ որեւէ ընտրատարածքում, ընտրատեղամասում եղել են լցոնումներ, խախտումներ: Եղել են երեք տեղամասի վերաբերյալ դիմումներ, բոլոր տեղամասերը բացվել են եւ ընդամենը մի քանի քվեաթերթիկի տարբերություն է եղել: Եթե լինեին լուրջ խախտումներ, անպայման իրենց վստահված անձինք, հանձնաժողովի անդամները կբողոքարկեին, դա հաշվի կառնվեր ԿԸՀ-ի կողմից եւ վերահաշվարկ կլիներ»,- հայտարարեց Հովիկ Աբրահամյանը:

Մեր խնդրանքով Հովիկ Աբրահամյանն անդրադարձավ նաեւ այն լուրերին, որ իշխանությունների կողմից տարբեր պաշտոններ են առաջարկվել Րաֆֆի Հովհաննիսյանին: Աբրահամյանը ընդգծեց, որ նման խոսակցություն անգամ չի եղել, ավելին` ինքը` Րաֆֆի Հովհաննիսյանը, պաշտոն չի ուզել: