Որտե՞ղ է պահվում սահմանին հայտնաբերված ռուս զինծառայողը

Yerkir.am-ի տեղեկություններով` Գյումրիում տեղի ունեցած դաժան սպանդի մեջ կասկածվող ռուս զինծառայող Վալերի Պերմյակովն այժմ պահվում է ռուսական ռազմաբազայի համապատասխան ստորաբաժանումում` ձերբակալվածների պահման վայրում (ՁՊՎ):

Մեր տեղեկություններով` նրան արդեն հարցաքննել են: Նախնական զրույցի ժամանակ հնարավոր չի եղել պարզել Պերմյակովի կապը սպանված ընտանիքի հետ:

Հիշեցնենք, որ ռուսական կողմը նրա նկատմամբ քրեական գործ է հարուցել  դասալքության և սպանության դեպքերի առթիվ:

Իսկ հայկական կողմից   սպանության գործով քննությունը հանձնարարվել է կատարել ՀՀ քննչական կոմիտեի Հատկապես կարևոր գործերի վարչությանը, հսկողությունն իրականացնում է գլխավոր դատախազությունը:

Yerkir.am-ի հետ զրույցում Շիրակի մարզի դատախազ Րաֆֆի Ասլանյանը հայտնեց, որ կասկածյալին ձերբակալել են երեկ գիշերը` ժամը 23:30-ի սահմաններում, սահմանը հատելու փորձ կատարելիս:

Դատախազը  բացառեց այն տեղեկությունը, թե հնարավոր է` սպանությունը կատարելիս հանցավոր խումբ գործած լինի:

Նրա խոսքով` այժմ իրենք չեն կարող Պերմյակովի ցուցմունքը հրապարակել, քանի որ նրան հարցաքննել է ռուսական կողմը:

Ըստ նրա` ամենայն հավանականությամբ, երկու կողմերում զինծառայողի դեմ հարուցված քրեական գործերը կմիացվեն և կքննվեն մի վարույթի շրջանակներում:

Նշենք, որ օրենքը թույլ չի տալիս մի անձի նկատմամբ նույն հոդվածներով հարուցված գործը քննել տարբեր վարույթներում: