Որտե՞ղ է պահվում Սյունիքի մարզպետի դեմ մահափորձի գործով ձերբակալված Արա Բուդաղյանը

Yerkir.am-ի տեղեկություններով` փաստաբան Հայկ Ալումյանին քիչ առաջ վերջապես թույլատրել են տեսակցել Սյունիքի մարզպետ Սուրիկ Խաչատրյանի դեմ մահափորձի գործով ձերբակալված Արա Բուդաղյանին: Նշենք, որ վերջինիս ձերբակալելուց հետո նախ տարել էին ԱԱԾ, ապա տեղափոխել Էրեբունու ձերբակալվածների պահման վայր:

Հիշեցնենք, որ երեկ ԱԱԾ-ն հաղորդագրություն էր տարածել և հայտնել, որ  Սյունիքի մարզպետ Սուրիկ Խաչատրյանի եւ նրա ուղեկիցների նկատմամբ 2015թ. մայիսի 20-ին  հրազենի գործադրմամբ սպանության փորձ կատարելու դեպքի առթիվ իրականացվող նախաքննության ընթացքում ՀՀ ԱԱԾ մարմինների կողմից ձեռնարկված օպերատիվ-քննչական գործողությունների արդյունքում, նշված հանցագործությանն առնչակից լինելու կասկածանքով, հուլիսի 3-ին ձերբակալվել են ՀՀ Սյունիքի մարզի Կապան քաղաքի բնակիչներ՝ Գարեն Ռոմիկի Աթաջանյանը, Հենրիկ Շահենի Ավագյանը եւ Գորիս քաղաքի բնակիչներ՝ Վիտալի Վլադիմիրի Մինասյանը և Արա Էմիլի Բուդաղյանը: