Սահմանին հայտնաբերված մեծաքանակ հերոինի գործով արդարացում են պահանջում

Yerkir.am-ի տեղեկություններով`  մոտ օրերս Հայաստան կժամանի հայ-իրանական սահմանին հայտնաբերված` առանձնապես խոշոր չափերի հերոինի գործով 17 տարվա ազատազրկման դատապարտված` 63-ամյա Ավթանդիլ Մարտիաշվիլիի վրացի պաշտպան Թեյմուրազ Մայսուրաձեն:

Նա մարտի 20-ին ՀՀ վերաքննիչ քրական դատարանում կներկայացնի բողոք` ընդդեմ Սյունիքի մարզի առաջին ատյանի դատարանի` իր պաշտպանյալի նկատմամբ կայացրած վճռի: Մասնավորապես`  Մայսուրաձեն պահանջելու է անվավեր ճանաչել ՀՀ Սյունիքի մարզի ընդհանուր իրավասության դատարանի` Աֆթանդիլ Մարտիաշվիլու (ՀՀ քր. օր. 215 հոդ. 2-րդ մասով և 266 հոդ. 3-րդ մասի 2-րդ կետով) վերաբերյալ դատավճիռը և նրա նկատմամբ կայացնել արդարացնող վճիռ:

Նշենք, որ այս գործով ՀՀ վերաքննիչ քրեական դատարանում, դատավոր Արմեն Դանիելյանի նախագահությամբ, կայացել է մեկ դատական նիստ, որի ընթացքում իրենց բողոքներն են ներկայացրել փաստաբաններ Վահե Մարգարյանն ու Հրաչ Հակոբյանը:

Մասնավորապես` Օսման Ուղուրլուի պաշտպան Վահե Մարգարյանը միջնորդել է մասնակիորեն բեկանել Սյունիքի մարզի ընդհանուր իրավասության դատարանի` Օսման Ուղուրլուի (ՀՀ քր. օր. 215 հոդ. 2-րդ մասով և 266 հոդ. 3-րդ մասի 2-րդ կետով) վերաբերյալ դատավճիռը, քրեական գործի վարույթը կարճել և դադարեցնել նրա նկատմամբ քրեական հետապնդումը: Հիշեցնենք, որ Ուղուրլուն դատապարվվել էր 19 տարվա ազատազրկման: