Բարձրաստիճան պաշտոնյաները վերահսկում են սահմանին հայտնաբերված հերոինի գործը

Այս տարվա հունվարի 17-ին Մեղրիի մաքսակետում առանձնապես խոշոր չափերի հերոին տեսակի թմրամիջոց հայտնաբերելու փաստով հարուցված քրեական գործի նախաքննությունն ավարտվել է, և գործն ուղարկվել է դատարան: Գործով երկու մեղադրյալները` թուրք Օսման Ուղուրլուն և վրացի Ավթանդիլ Մարտիաշվիլին, իրենց մեղավոր չեն ճանաչել: Այս մասին yerkir.am-ին հայտնեց Թուրքիայի քաղաքացի Օսման Ուղուրլուի պաշտպան Արտակ Գարոյանը:

Հիշեցնենք, որ թմրանյութը հայտնաբերվել էր Իրանից ՀՀ-ի տարածքով տարանցիկ դեպի Վրաստան ուղևորվող բեռնատարի զննման ժամանակ` հատուկ հարմարեցված թաքստոցում, և ըստ ԱԱԾ-ի հրապարակած տվյալների` հերոինի քաշը 927 կգ էր: Սակայն նախաքննությանն ընթացքում` թմրանյութը փորձաքննության ենթարկելուց հետո, պարզվել էր, որ թմրանյութի մաքուր քաշն իրականում 850 կգ է, իսկ մնացած 77 կգ-ը խառնուրդ է:

Yerkir.am-ի հարցին, թե ի՞նչ խառնուրդի մասին է խոսքը, Արտակ Գարոյանը պատասխանեց, որ շինանյութ է, իսկ առավել մանրամասն պարզ կդառնա դատաքննության ընթացքում: Նրա խոսքով` թմրանյութի մեջ խառնուրդն ավելացվել է Իրանի տարածքում: «Բեռնատարի նկատմամբ աննախադեպ խստություն էր սահմանված, կապարակնքված էր: Անգամ, երբ փորձագետը պետք է մոտենար` ինչ-որ գործողություն կատարեր, բարձրաստիճան պաշտոնյաները պետք է այդտեղ ներկա լինեին: Ոչ ոք իրավունք չուներ մոտենալու այդ բեռին»,- ասաց փաստաբանը և հավելեց, որ նույն խստությունը պահպանվում է ներկայումս:

Նշենք, որ Ուղուրլուն հայտնել է, որ ինքը չգիտեր, որ հերոին տեսակի թմրանյութ է տեղափոխում, և որ պատվիրատուներն ասել են, որ նախ ավազ տեղափոխի, որ տեսնեն` արդյո՞ք մեքենան կստուգեն, եթե`ոչ,   նոր հաշիշ կտեղափոխեն: Նա խոստովանել է, որ պատվիրատուներն իրեն խաբել են, և մի քանիսի անունը տվել է: Ըստ Ուղուրլուի` բեռը պետք է հասցվեր Ուկրաինա:

Նախաքննության ընթացքում աշխատանքներ են տարվել պատվիրատուներին հայտնաբերելու ուղղությամբ, սակայն որևէ մեկին չեն հայտնաբերել:

Հիշեցնենք, որ փաստի առթիվ ՀՀ Ազգային անվտանգության ծառայության քննչական վարչությունում հարուցվել է քրեական գործ` ՀՀ քրեական օրենսգրքի 215-րդ հոդվածի 2-րդ մասի հատկանիշներով: