«Նաիրիտ»-ի հարցով ենթահանձնաժողով կստեղծվի

Այսօր ԱԺ տնտեսական հարցերի մշտական հանձնաժողովում որոշում է կայացվել ստեղծել «Նաիրիտ» գործարանի մասնավորեցման եւ տնտեսական գործունեություն չիրականացնելու պատճառներն ուսումնասիրող ԱԺ ժամանակավոր ենթահանձնաժողով: Նախագծի համահեղինակներ են ՀՅԴ-ն, ՀԱԿ-ը, ԲՀԿ-ն, ՕԵԿ-ը եւ «Ժառանգություն»-ը:

Նախագիծը ներկայացրեց ԱԺ ՀՅԴ խմբակցության պատգամավոր Արծվիկ Մինասյանը:

ՀՀԿ պատգամավոր Ալեքսան Պետրոսյանը հետաքրքրվեց, թե ինչպե՞ս կարող են ստեղծել հանձնաժողով եւ քննարկել «Նաիրիտ»-ի հարցը, եթե անգամ հայտնի չէ, թե ով է սեփականատերը:

Արծվիկ Մինասյանն էլ կարծիք հայտնեց, որ նաեւ այդ նպատակով են ստեղծում ենթահանձնաժողովը:

Տնտեսական հարցերի մշտական հանձնաժողովի նախագահ, ԱԺ ՀՀԿ խմբակցության պատգամավոր Վարդան Այվազյանը նշեց, որ Հայաստանում գտնվող ամեն բանի սեփականատերը ՀՀ-ն է:

Որոշվեց, որ հանձնաժողովի անդամները կլինեն տասը: Երբ որոշում էին, թե որ խմբակցությունից ով է ներգրավվելու ենթահանձնաժողովի աշխատանքներում, ուշացումով նիստին եկած ՀԱԿ պատգամավոր Հրանտ Բագրատյանը հրաժարվեց մասնակցել ենթահանձնաժողովի աշխատանքներին՝ հայտարարելով, թե այդ հարցով թող դիմեն կոնկրետ ՀԱԿ կուսակցությանը: «Ճիշտ է, առանցքային հարցերի վերաբերյալ ես տեղեկացնում եմ խմբակցությանը, սակայն եթե ուզում եք ենթահանձնաժողովում ՀԱԿ-ն անդամ ունենա, դիմեք իրենց: Ես շատ զբաղված եմ այս ընթացքում, չեմ կարող մասնակցել եւ անգամ գազի հանձնաժողովի աշխատանքներին չեմ մասնակցում»,- ասաց նա:

Հանձնաժողովը որոշեց նաեւ «Նաիրիտ»-ի հարցով ենթահանձնաժողովի աշխատանքներն ամփոփել 2015թ. սեպտեմբերին: