"Նաիրիտ"-ի համար նոր ծրագիր է մշակվել

«Նաիրիտ»-ի համար երկար քննարկումներից հետո իրենց կողմից նոր ծրագիր է մշակվել. այսօր լրագրողներին հայտնեց ՀՀ էներգետիկայի եւ բնական պաշարների նախարար Արմեն Մովսիսյանը:

«Այն բավական մեծ ծրագիր է եւ  «Նաիրիտ»-ը վերագործարկելու հնարավորություն կտա»,- ասաց նախարարը` հավելելով, որ փորձում են ծրագիրն իրագործող կառավարիչ գտնել:

Նախարարը նաեւ հայտնեց, որ այսօր «Նաիրիտ»-ով հետաքրքրված է գերմանական մի ընկերություն, որին արդեն հրավիրել են Հայաստան` բանակցություններ վարելու:

«Գերմանական այդ ընկերությունը քիմիական ոլորտում բավական մեծ փորձ ունի: Հույս ունենք, որ բանակցություններն արդյունավետ կընթանան: Իսկ եթե ոչ, ապա նոր մրցույթ կհայտարարենք: Ասեմ նաեւ, որ գործարանով հետաքրքրված են նաեւ լեհական եւ ռուսական ընկերություններ»,- տեղեկացրեց Ա. Մովսիսյանը:

Հարցին, թե ե՞րբ կվճարվեն գործարանի աշխատողների աշխատավարձերը, նախարարը պատասխանեց, որ այդ հարցը քննարկման փուլում է, իսկ հստակեցման դեպքում կհրապարակվի նախարարության կողմից: