՛՛Նաիրիտ՛՛-ի շուրջ բանակցությունները տապալվում են

«Հայկական ժամանակ»-ի տեղեկությունների համաձայն, ՀՀ կառավարության և ռուսական «Իտեռա» ընկերության միջև «Նաիրիտի» շուրշ ընթացող բանակցությունները տապալման եզրին են: Կողմերը համաձայնության չեն գալիս առանցքային հարցերի շուրշ:

Ըստ տեղեկությունների, ռուսական կողմը պահանջում է զրոյացնել «Նաիրիտի» պարտքերը և որպես որևէ պարտավորությամբ չծանրաբեռնված ձեռնարկություն՝ վաճառել իրենց: Հայկական կողմին, սակայն, դա ինչ-ինչ պատճառներով ձեռնտու չէ: Խնդիրն այն է, որ տարիներ շարունակ «Նաիրիտի» հետ այնպիսի ֆինանսական մութ սխեմաներ են կիրառել, այնպես են «կթել» արդյունաբերական այդ հսկան, որ այսօր ոչ ոք չի կարող ասել, թե ի վերջո որքան պարտք ունի «Նաիրիտը», ում է պարտք, ինչպես են գոյացել այդ պարտքերը: 

Բավական է ասել, որ «Նաիրիտից» մի քանի տարի անընդմեջ «սնվել են» մի քանի օֆշորային ընկերություններ. որոնք տասնյակ միլիոնների շահույթներ են ստացել, իսկ «Նաիրիտը», մեղմ ասած, սնանկացել է: Ըստ որոշ հաշվարկների, «Նաիրիտի» պարտքերը տարբեր բանկերի և ընկերությունների կարող է հասնել մինչև 250-300 միլիոն դոլարի, իսկ «Նաիրիտի» վերազինման և արդիականացման համար անհրաժեշտ է մոտ կես միլիարդ դոլար: