Բրոնզը վատ չէ, բայց ակնկալում էի ոսկե մեդալ. Սարգիս Հովսեփյան

Արդեն հայտնել ենք, որ Հայաստանի պատանեկան օլիմպիական հավաքականը երեկ վերադարձել է Նանկինից:

 Ըմբշամարտի Հայաստանի ֆեդերացիայի պաշտոնական կայքը կարճ զրույց է ունեցել Նանկինի պատանեկան օլիմպիական խաղերի ազատ ոճի ըմբշամարտի 76 կգ քաշային կարգի բրոնզե մեդալակիրՍարգիս Հովսեփյանի հետ:

 -Սարգի՛ս, որքանո՞վ էր բրոնզե մեդալը համապատասխանում քո հնարավորություններին:

-Չգիտեմ, միայն կասեմ, որ այնքան էլ բավարարված չեմ: Բրոնզե մեդալը վատ չէ, բայց ես ակնկալում էի ոսկե վերադարձ:

-Այսինքն կարող էիր ավելի լավ մասնակցել:

-Իհարկե կարող էի, եթե հիմա պետք լիներ գորգի վրա ելնել, անպայման ճապոնացուն կհաղթեի:

-Իսկ ինչը՞ խանգարեց նրա հետ մրցամարտում:

-Չգիտեմ, գուցե այն, որ առաջին գոտեմարտն էր, կամ էլ անծանոթ լինելու հանգամանքը:

-Հավանաբար վերլուծում ես գոտեմարտերդ:

-Իհարկե, հատկապես որ առջևում նոր գոտեմարտեր են լինելու, ուրեմն հաշվի կառնեմ նաև Նանկինի փորձը:

-Իսկ ընդհանուր առմամբ, ինչպե՞ս կգնահատեիր օլիմպիական խաղերը:

-Հիանալի մարզական տոն էր, ըմբշամարտի մրցաշարն էլ շատ ուժեղ էր, բոլոր ըմբիշներն էլ լավն էին: Այդպիսի մրցակցությունում հաճելի է հանդես գալ:

 -Իսկ հաղթելն առավել ևս:

-Իհարկե: Բայց ախր կարող էի: Սակայն ինչ արած, ստիպված եմ հաջորդ մրցումների հաղթանակի մասին մտածել: