Ֆինանսական բուրգի գործը հնարավոր է քննվի կալանավայրո՞ւմ

Կենտրոն և Նորք-Մարաշ վարչական շրջանների ընդհանուր իրավասության դատարանում այսօր հետաձգվեց ֆինանսական բուրգի գործով դատական նիստը: Պատճառն, ինչպես միշտ, ամբաստանյալ Արթուր Անդրեասյանի վատառողջ լինելն էր, սովորականի նման նրա համար շտապօգնություն էր հրավիրվել:

Ամբաստանյալի խոսքով` ինքը վատացել է դատարան գալու ճանապարհին: Այդ կապակցությամբ գործով մեղադրողն ասաց, որ եթե հետևի ամբաստանյալի խոսքերին` հնարավոր է միջնորդի այս գործով նիստերն այսուհետ անցկացնել քրեակատարողական հիմնարկում:

Անդրեասյանի պաշտպան Սարգսյանն էլ, իր հերթին, հայտարարեց, որ ցանկանում է իր պաշտպանյալի նկատմամբ կրկնակի դատաբժշկական փորձաքննություն նշանակելու մասին միջնորդություն ներկայացնել:

Նշենք, որ, ըստ ՀՀ ԱՆ «Նուբարաշեն» ՔԿՀ-ի պետի` փաստաբանին ուղարկված գրության, ՔԿՀ-ի կալանավոր Արթուր Անդրեասյանին հետազոտության ենթարկելու արդյունքում պարզվել է, որ նրա կիստաները մեծացել են, և կլինիկայում նկատվում է բացասական դինամիկա:

Հաջորդ դատական նիստը նշանակվեց սեպտեմբերի 8-ին: