«Ֆինանսական բուրգի» գործով ամբաստանյալի համար հանձնաժողով կստեղծվի

«Ֆինանսական բուրգի» գործով ամբաստանյալ Արթուր Անդրեասյանի նկատմամբ նշանակված դատաբժշկական փորձաքննությունը կատարելու համար այս շաբաթ կձևավորվի համապատասխան մասնագիտական հանձնաժողով: Այս մասին այսօր Կենտրոն և Նորք-Մարաշ վարչական շրջանների ընդհանուր իրավասության դատարանում հայտնեց Անդրեասյանի շահերի պաշտապան Մնացական Սարգսյանը:

Հիշեցնենք, որ դատարանը նախկինում մի քանի անգամ մերժել էր Անդրեասյանի նկատմամբ փորձաքննություն նշանակելու վերաբերյալ`  նախորդ պաշտպանի` Համազասպուհի Գրիգորյանի միջնորդությունը, և միայն նախորդ դատական նիստում էր այդ որոշումը կայացվել:

Այսօրվա նիստում հերթական անգամ ամբաստանյալը հայտարարեց, որ իրեն վատ է զգում, մասնավորապես` գլխի շրջանում սուր ցավեր ունի և չի կարող մասնակցել դատավարությանը: Սարգսյանը, հաշվի առնելով իր պաշտպանյալի ցանկությունը, միջնորդեց հետաձգել դատական նիստը:

Ըստ նախորդ պաշտպանի` ամբաստանյալը տառապում է գլխուղեղի հետին պատի անեւրիզմով:

«Որ փորձաքննության պատասխանը ստացվեց, լա՞վ է զգալու իրեն»,- պաշտպանից հետաքրքրվեց դատավորը, սակայն, հաշվի առնելով կողմերի կարծիքները, հետաձգեց նիստը:

Այսօրվա նիստում գործով որպես տուժող անցնող  Արտակ Գալստյանի համար, որպես ներկայացուցիչ ներգրավվեց փաստաբան  Սուսաննա Սարգսյանը:

Հաջորդ դատական նիստը կկայանա հուլիսի 2-ին: