Ոստիկանության փակած գործի շուրջ «կենացները քաղցրանում են». ՎՊ-ի աղմկոտ բացահայտումները

Անցյալ տարի Արարատի մարզի մի շարք գյուղերի բնակիչներ  ջրանցում բազմաթիվ սատկած ձկներ էին հայտնաբերել, ավելին' իրենց հողամասերը ոռոգելուց հետո գյուղացիները նկատել էին, որ բերքը հեկտարներով փչացել է: Ստացված բողոքների հիման վրա քրեական գործ էր հարուցվել, որը հետագայում' «հանցակազմի բացակայության» պայմաններում, փակվել էր:

Այս առումով, սակայն, ուշագրավ բացահայտում է  արել Վերահսկիչ պալատը: Իր' «ՀՀ բնապահպանության նախարարության նկատմամբ իրականացված վերահսկողության արդյունքների վերաբերյալ» ընթացիկ հաշվետվությամբ ՎՊ-ն նախ' հիշեցնում է. «Վերահսկողությամբ արձանագրվել է, որ 2013 թվականի ապրիլին «Խոսրովի անտառ պետական արգելոց» ՊՈԱԿ-ի «Խոր Վիրապ» պետական արգելավայրի ջրային տարածքներում կենդանական և բուսական աշխարհին հասցվել է էական վնաս,  տեղի է ունեցել ձկնային պաշարների զանգվածային ոչնչացում: Փաստի վերաբերյալ նյութերը ներկայացվել են ՀՀ ոստիկանության Արարատի բաժին, սակայն քննության արդյունքում չի հիմնավորվել մարդկային գործոնի ազդեցությունը, որի հետևանքով մերժվել է քրեական գործի հարուցումը հանցագործության դեպքի բացակայության պատճառաբանությամբ»:

Իսկ այնուհետև հերթը հասնում է այս հարցում ՎՊ ուշագրավ բացահայտումներին, որոնց համաձայն` թունավորման օջախի անմիջական տարածքում շահագործվում է Վեդու ՋՕԸ -ի ոռոգման պոմպակայանը, որով ոռոգվում էին Փոքր Վեդի գյուղի մշակովի հողերը: Նշված ջրանցքի ջրերով ոռոգումը ռիսկային է, քանի որ ջրանցք են լցվում հարակից Տափերական, Փոքր Վեդի և այլ համայնքների կոյուղաջրերը' մշտապես ջրանցքն աղտոտելով կենցաղային և արտադրական թափոններով ու արտանետումներով:

«Վեդու ՋՕԸ -ի կողմից ոռոգման գործառույթն իրականացվել է առանց համապատասխան ջրօգտագործման թույլտվության: Գործունեության արդյունքում ոռոգման ջրի տրամադրման համար բնակչությունից 120 հա հողատարածքի համար գանձվել է տարեկան շուրջ 7,000.0 հազ. դրամ»,- նշվում է  ՎՊ ընթացիկ հաշվետվությունում:

Այս արձանագրումն ուշագրավ է այնքանով, որ ոստիկանության' այս գործը քննող սուբյեկտները «չեն նկատել» այս, մեղմ ասած, բացթողումը:

Այս հարցում ՎՊ-ն մեկ այլ ուշագրավ բացահայտում էլ է արել, մասնավորապես'  որ Վեդի քաղաքի տարածքում' Վեդի գետի վրա, դեռևս 2000թ. շահագործվող ՀՀ տարածքային կառավարման նախարարության ջրային տնտեսության պետական կոմիտեի ջրբաժան պատնեշի շինությունը կառուցվել է բնապահպանական նորմերի խախտումով: Կառույցում չի գործում ձկնուղի, փակվել է ձկների սեզոնային միգրացիան Արաքս գետից դեպի Վեդի գետի` Խոսրովի պետական արգելոցի տարածքում գտնվող բնական ձվադրավայրեր:

«Արդյունքում խոչընդոտվել է ձկների ձվադրությունն ու բազմացումը, որի հետևանքով վնաս է հասցվել կենդանական ու բուսական աշխարհի բնականոն զարգացմանը: Սակայն առ այսօր համապատասխան կազմակերպությունների կողմից անհրաժեշտ միջոցներ չեն ձեռնարկվել  վերոհիշյալ  շինությունը վերակառուցելու  ուղղությամբ: Անհրաժեշտ է «Շրջակա միջավայրի վրա ազդեցության փորձաքննության մասին» ՀՀ օրենքի համաձայն ջրբաժան պատնեշի շինության վերակառուցման և շահագործման փաստաթղթերը ներկայացնել փորձաքննության և կառույցը շահագործել համապատասխան վերակառուցման արդյունքում ձկնուղու  առկայության  պարագայում»,- նշվում է ՎՊ հաշվետվությունում: