Էրդողանի հայտարարությունը երազախաբություն է. Խաչիկ Ասրյան

ՀՀ սպորտի եւ երիտասարդության հարցերի նախարարի տեղակալ, «Հայոց Արծիվներ» հայրենասիրական հասարակական կազմակերպության նախագահ Խաչիկ Ասրյանի խոսքով`  եղեռնը բոլոր ազգերի համար մեծ ողբերգություն է այնպես, ինչպես Հայոց ցեղասպանությունը հայերի համար: Նա ընդգծում է, որ հայ ազգը պետք է համախմբված լինի ինչպես հայոց բանակի, այնպես էլ նախագահի ու պետականության կողքին, որպեսզի կերտենք հզոր Հայաստան:

Թուրքայի վարչապետ Էրդողանի հայտարարությունը Հայոց ցեղասպանության թեմայով Խաչիկ Ասրյանը լուրջ չի ընդունել, որովհետև, ըստ նրա, Էրդողանն ունեցել է հնարավորություն իր պաշտոնավարման տարիների ընթացքում ընդունելու Հայոց ցեղասպանությունը, սակայն դա չի արել: Հիմա, երբ Հայոց Ցեղասպանության 100-ամյա տարելիցի շեմին ենք, Էրդողանը փորձում է ձևական հայտարարություններ անել:

«Ինչ վերաբերում է սուլթանիզմի ճանապարհով առաջնորդվող Էրդողանին կամ նրա հայտարարություններին, ես դրանց չեմ հավատում: Դրանք երազախաբություններ են, որովհետև այսօր Թուրքիան, ի դեմս Էրդողանի, գնում է մի ճանապարհով, որը սուլթանիզմ է»,- ասաց Խաչիկ Ասրյանը:

Հարցին` թե ի՞նչ են անում իշխանությունները, որպեսզի արտագաղթ չլինի, իսկ երկիրը հզորանա, նա պատասխանեց. «Դուք տալիս եք հարց, որին ես իրավասու չեմ պատասխանել»: