Բոլորն ուզում են աշխարհը փոխել, ու ոչ ոք չի ուզում սկսել իրենից. Ժասմեն Ասրյան

Հարցազրույց  թիվ 3 ընտրատարածքում ՀՅԴ պատգամավորության թեկնածու Ժասմեն Ասրյանի հետ

Ժասմեն Հովհաննեսի Ասրյանը ծնվել է 1949թ. հուլիսի 28-ին Արցախի Հանրապետության (Լեռնային Ղարաբաղ)  Մարտակերտի շրջանի Վանք (Գանձասար) գյուղում: Մայրական կողմից նա սերում է Հասան-Ջալալյանների տոհմից (Իսաջան-Բեկ Հասան Ջալալյանի ծոռնուհին  է): Հավատարիմ մնալով տոհմական վաղնջական ավանդույթին` Ժասմենը շարունակում է ազգանվեր գործունեությունը: Հայրը՝ Հովհաննես Ասրյանը, նույնպես ազգի նվիրյալներից էր. Երկրորդ աշխարհամարտի ժամանակ, դաժան փորձություններից հետո հայտնվելով Ֆրանսիայում,  առանց վարանելու դարձել էր ֆրանսիական Դիմադրության շարժման անդամ ու ֆաշիզմի դեմ պայքարը շարունակել Միսաք Մանուշյանի ջոկատում: Ժասմենը 1971թ. ավարտել է Երևանի գեղարվեստա-թատերական ինստիտուտը և, որպես   դերասան, աշխատանքի անցել Հակոբ Պարոնյանի անվան երաժշտական կոմեդիայի թատրոնում: Շնորհաշատ դերասանուհուն հանդիսատեսը լավ է հիշում Քլեայի  (Ֆիգեյրեդո «Եզոպոս»), Ուրանիա (Պսաֆաս «Հիմարից հիմարը»), Սյուզոն  («Ութ սիրագորով կանայք»), Վարդուհի (Արամ-Աշոտ Պապայան «Գնա մեռի, արի սիրեմ»), Զառա (Երիցյան «Իմ զոքանչը»), Մարիամ Գյուլ ( Ա. Բարսեղյան «Պըլը Պուղի») և այլ գլխավոր կերպարներում:

Ժասմեն Ասրյանը ՀՀ Հանրային խորհրդի Ազգային արժեքների պահպանության, պատկանելության և օգտագործման խնդիրների ենթահանձնաժողովի նախագահն է: Նա զբաղված է նաև մանկավարժական գործունեությամբ՝ դասավանդում է արվեստի պատմություն: Պատգամավորության թեկնածուն ամուսնացած է, ունի երկու դուստր և չորս  թոռ: Նա Հայաստանում միակ դերասանուհին է, ով ազգանվեր գործունեությամբ մասնակցություն է ունեցել Արցախյան պատերազմին: Եվ պատահական չէ, որ ոչ դաշնակցական դերասանուհին ընդգրկվել է ՀՅԴ և´ համամասնական, և´ վարկանիշային ցուցակներում: Այս առիթով էլ հանդիպեցինք դերասանուհու հետ:

-Ինչո՞ւ Դաշնակցություն:

- Ըստ իս` ազգային նկարագիր ունեցող յուրաքանչյուր հայի մեջ նստած է Դաշնակցության ոգին, այսինքն՝ ազգայինը: Հիշում եմ՝ դեռ խորհրդային ժամանակից, դպրոցական տարիներիս էլ, եթե որևէ մեկն ազգասիրական ելույթներ էր ունենում, անմիջապես բնորոշում էին՝ «դաշնակցական է»: Մինչ Արցախյան շարժումն էլ ինձ բոլորը դաշնակցական էին անվանում իմ ազգասիրական դրսևորումների համար: Ես ՀՅԴ անդամ չեմ, սակայն Արցախյան շարժման սկզբից ևեթ, առնչվելով ՀՅԴ անդամների հետ, համոզված էի, որ հայրենիքի ու ազգի պաշտպանությունն ու անվտանգությունը պետք է վստահել միմիայն ՀՅԴ-ին: Այս էր պատճառը, որ անվարան համաձայնեցի, երբ նրանցից առաջարկություն ստացա: Ի դեպ, այս առաջարկությունը միակը չէր, մինչ այդ այլ քաղաքական ուժերից էի առաջարկություն ստացել, որոնք մերժել էի: Եթե վերլուծենք ՀՅԴ անցած ուղին և ներկայի գործունեությունը, ապա կհամոզվենք, որ 127-ամյա կուսակցությունն առանձնանում է իր անշահախնդրությամբ ու ազգանվեր կեցվածքով:

- Ձեր ծրագրային դրույթներից  ո՞րը կառանձնացնեիք, Ձեր ծրագիրը  կրկնո՞ւմ  է ՀՅԴ ծրագիրը:

-Չի կրկնվում, թեև ես ամբողջությամբ ընդունում եմ ՀՅԴ ծրագիրը: Կարևորը գաղափարախոսության ընդհանրությունն է, ասել է, թե մենք նույն ուղղությամբ ենք նայում:

- Ընտրվելու դեպքում ո՞րն է լինելու Ձեր առաջին քայլը ԱԺ-ում:

- Չեմ տարբերակում քայլերի հերթականությունը: Հավատարիմ մնալով էությանս ու սկզբունքներիս` առանց առանձնացնելու քայլերս, պարտավոր եմ ծառայել երկրիս ու ժողովրդիս:

- Ձեր կարծիքով որքա՞ն ձայն կհավաքի ՀՅԴ-ն:

-Քարոզարշավի ընթացքում նկատելի է, որ մեծ է ընտրողների հետաքրքրությունն ու վստահությունը ՀՅԴ-ի նկատմամբ: Նրանք, Դաշնակցությանը համեմատելով այլ կուսակցությունների հետ, առանձնացնում են կուսակցության կեցվածքը, գրագետ պատգամավորներ ունենալը և նրանց անբիծ դիմագիծը: Չեմ կարող ասել` քանի տեղ կունենանք, բայց վստահ եմ, որ ավելին կլինի, քան նախորդ գումարման ժամանակ էր:

-Մտնում եք մեծ քաղաքականություն, ի՞նչ եք կարծում, ՀՀ-ն պե՞տք է ճանաչի Արցախի անկախությունը, թե՞…

 -Պարտավոր է ճանաչել, բայց նախորդող դիվանագիտական քայլեր են անհրաժեշտ՝ միջազգային օրենքներին համապատասխան: Ավելին՝ ՀՀ-ն  միջազգային կառույցներում ու տարբեր պետությունների հետ դիվանագիտական հարաբերություններում Արցախին վերաբերող  հարցերում չպետք է հանդես գա Արցախի Հանրապետության փոխարեն: Արցախի Հանրապետությունն էլ չպետք է թույլատրի որևէ մեկին իր փոխարեն հանդես գալ: Ի վերջո, հրադադարի պայմանագիրը կնքվել է Արցախի Հանրապետության (ԼՂ), Հայաստանի Հանրապետության և Ադրբեջանի միջև:

-ՀՀ-ն ունի՞ արտաքին քաղաքականություն:

 - Չափազանց թույլ է այն: Գտնում եմ, որ արտաքին քաղաքականության մեջ մեծ ձեռքբերումներ կունենայինք, եթե ԱԳՆ-ն դաշնակցական ղեկավարեր: ՀՅԴ-ի ներուժն ու ունեցած  կապերն այդպես էլ արժանվույն չգնահատվեցին անկախացած  Հայաստանի Հանրապետությունում:

-Բոլորը բողոքում են ստեղծված իրավիճակից, Դուք ելքի ի՞նչ ուղիներ եք տեսնում:

- Ցավոք, բոլորն ուզում են «աշխարհը փոխել, ու ոչ ոք չի ուզում սկսել իրենից»: Ես ելքի ուղիները տեսնում եմ ՀՅԴ-ի` իշխանության գալու մեջ: Կարծում եմ` ԱԺ մտնել ցանկացող բոլոր քաղաքական ուժերն այս վճռորոշ պահին կհամախմբվեն ՀՅԴ-ի շուրջը: Ու այդ գործում մեծ անելիք ունի մեր ժողովուրդը՝ իր վստահության քվեն տալով ՀՅԴ-ին:

Զրուցեց Գոհար Արշակյանը