Չեմպիոնների լիգա. արդյունավետ ոչ-ոքիներ՝ 2 խաղում

Չեմպիոնների լիգայի քառորդ եզրափակիչի մեկնարկային 2 խաղում թիմերը փոխանակեցին մեկական գնդակ:

«Բարսելոնա»-ն սեփական հարկի տակ մրցեց «Ատլետիկո Մադրիդ»-ի հետ: Հյուրերը 56-րդ րոպեին բացեցին հաշիվը: Դիեգոյի գեղեցիկ հարվածից հետո Պինտոն չկարողացավ փրկել իր թիմին: 71-րդ րոպեին Ինիեստայի գեղեցիկ փոխանցումից հետո Նեյմարը հավասարեցրեց հաշիվը:

«Մանչեսթեր Յունայթեդ»-ը «Օլդ Թրաֆորդ»-ում ընդունեց Չեմպիոնների լիգայի և Գերմանիայի նորընծա չեմպիոն «Բավարիա»-ին: Տանտերերը 58-րդ րոպեին Նեմանյա Վիդիչի խփած գոլի շնորհիվ բացեցին հաշիվը, սակայն 9 րոպե անց Բաստիան Շվայնշտայգերը հավասարեցրեց այն: Հավելենք, որ խաղավերջում Շվայնշտայգերը արժանացավ կարմիր քարտի: